Ergys Agasi i është drejtuar Gjykatës së Posaçme kundër Korrupsionit dhe Krimit të Organizuar (GJKKO), duke kërkuar ...
AKTUALITET
“Armën e bleva në Temu”/ Zbardhet dëshmia e 20-vjeçarit që hiqej si polic
PiranjatPërditësimi i fundit 6 Nëntor 2025, 12:39
Në dëshminë e dhënë para autoriteteve, i riu 20-vjeçar Ervis Brasha që u ndalua duke u shtirur si polic ka deklaruar se armën e kishte blerë në platformën online “Temu”
Sipas dosjes, Brasha është nën hetim për “falsifikim të dokumenteve”, “mbajtje pa të drejtë të uniformës”, “përvetësim të titullit apo detyrës shtetërore” dhe “prodhim e mbajtje pa leje të armëve të gjuetisë dhe sportive”.
I riu u ndalua nga shërbimet e patrullës së përgjithshme të Komisariatit nr. 5 Kamëz, teksa drejtonte një automjet me targë AB252VO, i veshur me uniformë të plotë policie, grada dhe stema.
Pas verifikimit në sallën operative, rezultoi se Brasha nuk ishte punonjës i Policisë së Shtetit. Gjatë kontrollit në mjet, efektivët gjetën katër spaleta policie, dy stema gjoksi me gradat N/Komisar dhe Komisar, si dhe dokumente identifikimi të dyshuara të falsifikuara, që mbanin emrin, mbiemrin dhe fotografinë e tij. Një prej dokumenteve kishte mbishkrimin “Drejtoria Vendore e Policisë së Shtetit”, ndërsa një tjetër atë të “Policisë Bashkiake Tiranë”.
Në dëshminë e tij, Brasha ka rrëfyer se më herët kishte qenë punonjës i policisë bashkiake të Tiranës, por kishte dhënë dorëheqjen për t’u bërë pjesë e Policisë së Shtetit. Ai ka thënë se ka aplikuar për pranim, por nuk i ka kaluar të gjitha etapat e kualifikimit.
“E kam pasion të jem punonjës policie, për këtë arsye i kam mbajtur këto veshje,” – ka deklaruar ai para oficerëve.
Në lidhje me armën e gjetur, Brasha ka pohuar se bëhej fjalë për armë imitim, të blerë online në faqen Temu, ndërsa për dokumentet është shprehur se i ka printuar dhe plastifikuar gjatë kohës kur punonte në Policinë Bashkiake, në një kancelari që nuk e mban mend.
Sipas të dhënave të dosjes, automjeti që drejtonte 20-vjeçari rezulton i marrë me qira në zonën e Astirit. Brasha ka deklaruar se do të japë shpjegime të tjera përpara gjykatës në një moment të dytë.
Hetimet për rastin vijojnë nën drejtimin e Prokurorisë së Tiranës, ndërsa uniformat dhe dokumentet e sekuestruara janë dërguar për ekspertizë kriminalistike.
