Përdoruesit e platformave Facebook, Instagram dhe Messenger kanë raportuar probleme me funksionimin e tyre pasditen e së mërkurës, 22...
AKTUALITET
Blegtorët e dy fshatrave në Ersekë në protestë: Një person i vetëm na përvetësoi 400 hektarë tokë
PiranjatPërditësimi i fundit 15 Janar 2026, 13:02
Banorët e fshatrave Taç i Sipërm dhe Prodan në Ersekë, protestuan sot (15 janar), kundër zaptimit të kullotave që ata pretendojnë se u përkasin dy fshatrave.
Sipas banorëve, sipërfaqe të konsiderueshme kullotash janë përvetësuar nga një person i vetëm, i cili ka marrë në zotërim mbi 400 hektarë tokë.
Ata shprehen se këto sipërfaqe pritet të përdoren për vendosjen e paneleve fotovoltaike, ndërsa theksojnë se kjo situatë i dëmton rëndë, pasi burimi i vetëm i të ardhurave për familjet e tyre është blegtoria.
Rreth 100 blegtorë nga të dy fshatrat preken drejtpërdrejt nga ky zaptim, duke rrezikuar aktivitetin blegtoral.
Banorët i bëjnë thirrje organeve ligjzbatuese dhe institucioneve përkatëse që “të ndërhyjnë dhe të rishikojnë dokumentacionin e pronësisë”.
“Ka mbivendosje të hartave të truallit, ç’ka ka sjellë përfshirjen e padrejtë të kullotave që përdoren prej vitesh për mbajtjen e bagëtive”, shprehen ata.
Protestuesit kërkojnë zgjidhje të menjëhershme dhe rikthimin e kullotave në përdorim të tyre duke paralajmëruar se “do të vijojnë protestat nëse nuk do të ketë reagim nga institucionet përgjegjëse”.
Në reagimin e tyre gjatë protestës, blegtorët dhe banorët e dy fshatrave treguan edhe dokumentet e hartave topografike, tapive dhe pronësive të këtyre tokave që janë kullotë.
Ata shprehen se me këto kullota mbajnë familjen gjallë, pasi në të kundërt, nëse Bashkia finalizon kalimin përfundimtar për park fotovoltaik, ata do të mbeten rrugëve dhe bagëtitë do mbeten pa ushqim.
