Kur qeveria përballet me protesta dhe skandale, zgjedh të fajësojë Iranin. Por alibia e luftës hibride nuk mbulon dot krizën e t...
AKTUALITET
Breshëri kallashi mes fëmijëve në Mamurras
Nga Elton QynoPërditësimi i fundit 19 Maj 2026, 14:23
Një ngjarje e rëndë kriminale, ku janë përdorur armë të rënda automatike, ka ndodhur në prezencë të fëmijëve të mitur, të cilëve u është rrezikuar seriozisht jeta nga të shtënat e pakontrolluara që vinin nga disa drejtime.
Rasti kriminal është regjistruar në muajin korrik 2024 në fshatin Shpërdhet të Mamurrasit, por tashmë dosja ka kaluar për gjykim në shkallën e parë dhe në Gjykatën e Apelit Tiranë.
Sipas dosjes hetimore dhe pamjeve filmike, një grup personazh të armatosur, ku bënin pjesë edhe Ardian Ahmeti, si dhe një punonjës i policisë rrugore, Sahit Ahmeti, dyshohet të kenë qëlluar me armë automatike mbi disa persona që qëndronin në ambientet e një tabakino, buzë rrugës.
Dukshëm në pamjet filmike të shtënat e armëve kanë tronditur dhe rrezikuar seriozisht jetën e fëmijëve të mitur që largohen me shpejtësi, duke hyrë në ambientet e tabakinos, për ti shpëtuar plumbave të automatikëve.
Në pamjet filmike duken qartë që pas të shtënave oficerët e policisë kriminale që shkojnë në brendësi të tabakinos, ku mes tyre dallohet dhe Drejtori i Policisë Kriminale, Tonin Vocaj, që fillimisht kërkon që Ylli Sela që ndodhej në banak, ti bëjë një kafe të shkurtër dhe më pas Ylli Sela arrestohet, duke qëndruar gati 6 muaj në burg.
Kjo përplasje me armë ka si motiv konfliktin për prona mes dy kushërinjve që nuk kanë mundur ta zgjidhin paqësisht, por njëra palë ka sulmuan palën tjetër me armë zjarri, duke prodhuar skena të tilla që shihen në këto video.
Për këtë ngjarje prokuroria e Tiranës ka nisur procedimin penal nr. 4842. Kjo dosje është regjistruar në prokurorinë e Tiranës mbi bazën e materialit referuar të përcjellë nga policia e kryeqytetit, e cila ka kryer veprime hetimorë, mbi një ngjarje të rëndë kriminale të ndodhur në 25 Korrik 2024 në fshatin Shpërdhet të Mamurrasit.
Sahit Ahmeti, me detyrë punonjës policie rrugore, pranë Komisariatit të Policisë Krujë, Ardian Ahmeti, dhe disa personave të tjerë lidhje të tyre të ngushta familjare kanë debatuar dhe janë konfliktuar fizikisht me vëllezërit Fatos Sela dhe Ylli Sela, për shkak të mosmarrëveshjeve lidhur me pronësinë e një sipërfaqe toke.
Konflikti midis tyre, ka vijuar në përdorimin e armëve të zjarrit ku si pasojë e të shtënave kanë mbetur të plagosur nga njëra palë punonjësi i policisë Sahit Ahmeti, Adrian Ahmeti dhe nga pala tjetër Fatos Sela, të cilët më pas janë transportuar për të marrë ndihmë më të specializuar mjekësore në Spitalin e Traumës, Tiranë.
Referuar raportit të shërbimit, rezulton se në momentin që i dëmtuari, Sahit Ahmeti, me detyrë punonjës policie, ka mbërritur në Spitalin Universitar të Traumës, Tirane, nga familjaret e tij, dhe konkretisht Ledion Ahmeti, ka dorëzuar armën e shërbimit, pistoletë “BERETA”, e cila është sekuestruar në cilësinë e provës materiale.
Në këtë ngjarje kanë mbetur të plagosur dhe dy vëllezërit Fatos Sela dhe Ylli Sela. Policia kriminale ka shkuar në vendngjarje duke kryer dhjetëra veprime hetimore, sekuestrimin e sendeve/provave dhe shoqëruar disa persona në ambientet e Drejtorisë së Policisë Tiranë.
Në pamjet filmike duken qartë oficerët e policisë kriminale që shkojnë në brendësi të tabakinos, ku mes tyre dallohet dhe Drejtori i Policisë Kriminale, Tonin Vocaj, që fillimisht kërkon që Ylli Sela që ndodhej në banak, ti bëjë një kafe të shkurtër dhe më pas Ylli Sela arrestohet, duke qëndruar gati 6 muaj në burg.
Lidhur me këtë ngjarje të rëndë prokuroria e Tiranës ka marrë të pandehur vetëm 4 persona, siç janë shtetasit Fatos Sela, Ylli Sela, Ardian Ahmeti dhe Sahit Ahmeti.
Ndërsa dy personat e tjerë Redion Ahmeti dhe Gazmir Ahmeti nuk kanë asnjë akuzë penale, megjithëse situata e provave ndaj tyre nuk është favorizuese. Një dukuri kjo që është parë shpesh herë me drejtësinë e re, ku përgjegjësia penale në shumë raste mbetet jetime.
Lidhur me këtë ngjarje pak muaj më parë në fund të procesit gjyqësor përfaqësuesi i prokurorisë i kërkoi gjykatës deklarimin fajtor dhe dënimin me 15 vjet burgim për të pandehurin Ardian Ahmeti, për akuzën e “Vrasjes me dashje” të mbetur në tentativë dhe “Mbajtjes pa lejë të armëve të zjarrit”.
Deklarimin fajtor dhe dënimin me 6 vite burgim të punonjësit të policisë rrugore Sahit Ahmeti, për akuzën e “Plagosjes së rëndë me dashje” kryer në bashkëpunim.
Ndërsa për të pandehurin tjetër Ylli Sela, prokuroria kërkoi pushimin e akuzës për “Vrasje me dashje” të mbetur në tentativë.
Pas dëgjimit të konkluzioneve të mbrojtësve dhe pretencës së prokurorisë, gjykata e Tiranës vendosi dënimin me 9 vite burgim të Ardian Ahmetit. Por për shkak të gjykimit të shkurtuar ai u dënua përfundimisht me 6 vite burgim.
Ndërsa punonjësi i policisë rrugore Sahit Ahmeti, u dënua me 5 vjet burgim. Por për shkak të gjykimit të shkurtuar gjykata e dënoi përfundimisht me 3 vjet e 4 muaj burgim.
Por edhe këtë masë dënimi ia kaloi në shërbim prove që të mos kryejë asnjë vepër penale për një periudhë kohore 3 vjeçare. Tashmë çështja ka mbërritur në gjykatën e Apelit të Tiranës dhe është në pritje të një vendimmarrje.
