Partia Popullore Evropiane, grupimi më i madh i partive politike të djathta dhe të qendrës në Evropë, reagoi sërish për ...
AKTUALITET
Denoncimi i qytetarit: Në lumin e Mërturit po kryhen punime të rënda me mjete mekanike
PiranjatPërditësimi i fundit 26 Qershor 2026, 16:15
Banorët e zonës së Nikaj-Mërturit kanë denoncuar për Piranjat news, punimet që po zhvillohen pranë shtratit të lumit Mërtur, ku prej ditësh po operojnë mjete të rënda mekanike, pa asnjë informacion zyrtar.
Sipas denoncimit, në terren mungojnë tabelat informuese, ndërsa banorët nuk janë njohur me dokumentacionin ligjor dhe studimet e ndikimit në mjedis. Banorët shprehin frikën se ndërhyrjet mund të shkaktojnë dëme të parikuperueshme në ekosistemin e lumit, duke rrezikuar biodiversitetin, turizmin natyror.
Mesazhi i qytetarit:
Po ju drejtohem si qytetar i shqetësuar për situatën që po zhvillohet në Lumin e Mërturit, në zonën e Nikaj-Mërturit. Në terren po kryhen punime të rënda me mjete mekanike brenda dhe pranë shtratit të lumit, ndërsa banorët nuk kanë marrë informacion të qartë mbi natyrën e projektit, ndikimin mjedisor dhe përfitimet reale për komunitetin.
Shqetësimi ynë lidhet me mundësinë që këto ndërhyrje të dëmtojnë një nga pasuritë më të rëndësishme natyrore të zonës, duke rrezikuar ekosistemin, turizmin dhe identitetin e Nikaj-Mërturit. Deri më tani nuk janë vendosur tabela informuese në terren dhe mungon transparenca publike mbi dokumentacionin, lejet dhe studimet e ndikimit në mjedis.
Ju kërkojmë të ngrini këtë çështje publikisht dhe të kërkoni verifikimin e ligjshmërisë së punimeve, publikimin e të gjitha dokumenteve përkatëse dhe garantimin që interesat e banorëve dhe mbrojtja e natyrës të vendosen mbi çdo interes tjetër.
Lumi i Mërturit është një pasuri që i përket jo vetëm banorëve të zonës, por gjithë Shqipërisë. Çdo ndërhyrje duhet të jetë transparente, e ligjshme dhe në përputhje me mbrojtjen e mjedisit./piranjat news
