Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një r...
AKTUALITET
E hëna nis me miliardat e AKSHI-t, Ermal Beqiri merret në pyetje nga SPAK
PiranjatPërditësimi i fundit 15 Shtator 2025, 10:35
Ermal Beqiri është marrë pyetje në kuadër të një hetimi nga SPAK, për të cilin oficerët e BKH-së kanë ushtruar në fillim të muajit Gusht në zyrat e kompanisë “Soft & Solution” në pronësi të tij.
Kompania “Soft & Solution” vijon të jetë një nga përfitueset më të mëdha të kontratave publike në sektorin e teknologjisë, pa u përballur me asnjë pengesë ligjore apo institucionale.
Nuk dihet nëse hetimi i SPAK ka të bëjë me ndonjë tender të fituar nga kompania “Soft & Solution” nga institucioni i AKSHI-t të drejtuar nga Mirlinda Karçanaj, apo me diçka tjetër. Pas daljes nga SPAK, Ermal Beqiri nuk ka dhënë asnjë prononcim për mediat.
Historia e dyshimtë e “perandorisë” së Ermal Beqirit Tenderat me dhjetëra milionë euro të Agjencisë Kombëtare të Shoqërisë së Informacionit (AKSHI) kanë krijuar një situatë oligopoli, ku fondet qeveritare ndahen mes një grushti të vogël kompanish private, disa prej të cilave të lidhura mes tyre.
Një nga emrat më të rëndësishëm në këtë “oligopol” është biznesmeni Ermal Beqiri, i cili aktualisht zotëron dy shoqëri fituese të tenderave të mëdhenj të AKSHI-t: “Soft & Solution” dhe “Horizon”. “Perandoria” e tij në fushën e IT-së është ngritur mbi një të shkuar të diskutueshme.
Emri i Beqirit doli për herë të parë në vëmendje publike në vitin 2011, kur si inxhinier elektronik 30-vjeçar nga Gjirokastra, në atë kohë Drejtor i IT-së në Rektoratin e Universitetit të Tiranës, u thirr si ekspert në procesin gjyqësor për “korrupsion” ndaj ish-zv.kryeministrit Ilir Meta. Ai ishte një nga ekspertët që analizoi videon e njohur “Meta-Prifti”, ku diskutohej për një shumë prej 700 mijë eurosh. Ekspertiza e Beqirit dhe kolegëve të tij përfundoi se videoja ishte e manipuluar, duke çuar në pafajësinë e Metës nga Gjykata e Lartë.
Në të njëjtën periudhë, Beqiri themeloi kompaninë “Al-Forensic” së bashku me kolegun e tij Ardian Pollo, edhe ai ekspert i thirrur për videon. Por shoqëria u pezullua në vitin 2015, pasi fitimet ishin minimale. Më herët, ai kishte provuar të krijonte kompaninë “Al-Soft” në vitin 2010, e cila u mbyll brenda vitit.
Beqiri u rikthye në qendër të vëmendjes në fund të vitit 2013, me të ashtuquajturin “skandali i serverit të Tatimeve”. Në atë kohë, ai shërbente si këshilltar informatik në kabinetin e kryeministrit Edi Rama. Bashkë me Panajot Gjiknurin (vëllain e ish-ministrit Damian Gjiknuri), ai kreu auditimin administrativ të serverit, por një hetim penal i mëvonshëm konstatoi se bëhej fjalë për një anomali teknike dhe jo ndërhyrje të paligjshme.
Lidhjet e tij me politikën nuk u ndalën aty. Në vitin 2012 u regjistrua kompania “Alb Red Stone”, me aksionerë Ramazan Domi, Ermal Beqiri dhe Arbër Braho, djali i deputetit Spartak Braho. Kompania vijon të jetë aktive me aktivitet në nxjerrjen dhe përpunimin e mineraleve.
Në vitin 2015, Beqiri emërohet Drejtor i IT-së pranë Hipotekës. Pikërisht në këtë periudhë, kompania private “Soft & Solution”, pa histori të madhe deri atëherë, nis të fitojë tendera të njëpasnjëshëm në këtë institucion. Raportime mediatike të vitit 2016 ngritën dyshime se Beqiri ishte pronari i vërtetë i kompanisë, edhe pse në letër ajo rezultonte në emër të Arjola Koromanit. Në vitin 2021, kjo u zyrtarizua: Koromani ia shet shoqërinë Beqirit për 1 milion lekë, ndërsa ajo mbeti administratore.
Në vijim, Beqiri zgjeron portofolin e bizneseve të tij:
Janar 2018: krijon kompaninë “5min.al” (qira makinash), e cila u pezullua në janar 2019. Mars 2024: themelon “R&D Solution”, me objekt kërkime shkencore dhe teknologjike. Administratore është sërish Arjola Koromani. Prill 2024: blen për 144 mijë euro kompaninë “IT Tirana”, të cilën e riemëron “NSolution”. Maj 2024: blen për 380 mijë euro shoqërinë “Horizon”, të themeluar në vitin 2005 dhe deri atëherë në pronësi të një kompanie offshore qipriote “Comscope Limited”. Sot, Ermal Beqiri është një nga lojtarët kryesorë në tregun e tenderave publikë në fushën e IT-së, me një histori që ngre më shumë pyetje sesa përgjigje: nga eksperti i një videoje politike, në ndërtuesin e një “perandorie” teknologjike të mbështetur mbi tendera publikë dhe lidhje politike.
