Gjykata e Tiranës ka caktuar masën e sigurisë detyrim paraqitjeje për 18 persona të arrestuar gjatë protestave në Tiran&eum...
AKTUALITET
E mitura e traumatizuar dëmtoi veten dhe policen, ja i burgosuri 'VIP' që përndiqte 16-vjeçaren nga qelia
PiranjatPërditësimi i fundit 21 Tetor 2025, 14:44
Specialistët e Krimeve në Tiranë kanë referuar materialet në Prokurori ndaj shtetasit Jetmir Llanaj, 46 vjeç, i cili ndodhet aktualisht në burg, si dhe në lidhje me një 16-vjeçare, viktimë e përndjekjes.
Hetimet paraprake tregojnë se Llanaj, në bashkëpunim me një person ende të paidentifikuar, ka përndjekur të miturën, duke ndikuar rëndë në gjendjen e saj psikologjike. Si pasojë, vajza ka kryer një akt vetëdëmtimi të lehtë me mjet prerës.
Gjatë marrjes në pyetje në ambientet e Komisariatit Nr. 5 në Tiranë, e mitura ka reaguar në mënyrë të dhunshme duke goditur një punonjëse policie, çka ka përshkallëzuar situatën në komisariat.
Sipas burimeve për A2 CNN, përndjekja ndaj vajzës ka ndodhur në muajin korrik, ndërsa më pas Llanaj ka nisur të përndjekë edhe një shtetas tjetër. Denoncimi për të dy rastet është bërë nga 16-vjeçarja në shoqërinë e prindit të saj.
Jetmir Llanaj ndodhet në paraburgim që prej 6 marsit, pasi u arrestua nga Policia e Lezhës si pjesë e një grupi prej pesë personash që dyshohet se vendosnin gjoba ndaj bizneseve, për përfitime të paligjshme.
Sipas policisë, Llanaj përdorte dy të mitur dhe dy persona të tjerë për të dërguar mesazhe kërcënuese ndaj subjekteve private, në funksion të përfitimit pasuror.
Aktualisht, ndaj tij rëndon edhe akuza për përndjekjen e së miturës, ndërkohë që Policia e Tiranës vijon punën për identifikimin dhe kapjen e bashkëpunëtorit të tij, si dhe për zbardhjen e plotë të ngjarjes.
