Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
EMRAT/ Plagosi me armë zjarri 24-vjeçarin gjatë një konflikti për motive të dobëta, arrestohet në Durrës autori i shpallur në kërkim
S.BPërditësimi i fundit 28 Gusht 2024, 11:41
pamje nga ngjarja
DURRËS- Një 33-vjeçar i cili ishte në kërkim është arrestuar ditën e sotme në Durrës. Bëhet me dije se Ilir Buçeza 33 vjeç, ishte në arrati prej 3 muajsh, pasi plagosi me armë zjarri djalin e xhaxhait 24-vjeçarin Eduart Buçeza.
Gjykata e Durrësit ka dënuar Buçezën me burg për “Plagosje të rëndë me dashje” dhe “Mbajtje pa leje dhe prodhimi i armëve, armëve shpërthyese dhe i municionit”.
Ngjarja ka ndodhur më 21 maj të këtij viti, në fshatin Shënavlash, ku Ilir Buçeza plagosi me armë zjarri para banesës së shtëpisë djalin e xhaxhait Eduart Buçezën. Ky i fundit u paraqit në spitalin e Durrësit i plagosur në këmbë me armë zjarri.
Menjëherë pas ngjarjes u publikuan dhe pamjet e plagosjes ku 33-vjeçari futet nga porta e banesës dhe pasi ka bërë disa hapa para është përballur me kushëririn e tij i cili është afruar i qetë, duke mos pasur dijeni për armën. Pasi janë afruar Ilir Buçeza ka drejtuar armën drejt 24-vjeçarit dhe e ka qëlluar tre herë me plumb, njëri prej të cilëve i ka prekur këmbën.
Pasi ka lënë të plagosur kushëririn e tij autori është larguar me vrap, në drejtim të paditur. Nga raportimet thuhet se ngjarja ka ndodhur për një konflikt për motive të dobëta.
Njoftimi i Policisë:
Durrës/Finalizohet operacioni policor i koduar "Shënavlashi", për kapjen e një shtetasi të shpallur në kërkim.
Plagosi me armë zjarri, një 24-vjeçar, rreth 3 muaj më parë, lokalizohet, kapet dhe vihet në pranga 33-vjeçari.
Si rezultat i kërkimeve dhe administrimit të informacioneve të inteligjencës policore, të kryera në vijim të megaoperacionit kombëtar të koduar “Sundimi i ligjit”, me objektiv ndalimin e shtetasve të shpallur në kërkim, Sektori kundër Krimeve të Rënda i Drejtorisë Vendore të Policisë Durrës lokalizoi, kapi dhe vuri në pranga shtetasin Ilir Buçeza 33 vjeç.
33-vjeçari ishte shpallur në kërkim, pasi Gjykata e Durrësit, më datë 30.05.2024, i ka caktuar masën e sigurisë “Arrest në burg”, për veprat penale “Plagosja e rëndë me dashje” dhe “Mbajtja pa leje dhe prodhimi i armëve, armëve shpërthyese dhe i municionit”.
Ky shtetas dyshohet së më datë 21.05.2024, gjatë një konflikti për motive të dobëta, në fshatin Shënavlash, ka plagosur me armë zjarri, shtetasin E. B., 24 vjeç.
Materialet procedurale i kaluan Prokurorisë së Durrësit, për veprime të mëtejshme.
