Kryeministri Edi Rama ka vijuar sulmet ndaj protestuesve që prej javësh janë mbledhur në Tiranë kundër qeverisë së tij...
AKTUALITET
EMRI/ Vetëdorëzohet 31-vjeçari i plagosur në vrasjen e Rexhep Ismailit, zbardhet roli i tij
PiranjatPërditësimi i fundit 8 Maj 2026, 16:28
Është vetëdorëzuar në polici një nga të rinjtë e përfshirë në sherrin e dhunshëm në fshatin Gjashtë të Sarandës, ngjarje që përfundoi me vrasjen e 66-vjeçarit Rexhep Ismaili.
Bëhet fjalë për Kostandin Voglin, 31 vjeç, banues në Shën Vasil të Himarës, i cili sipas burimeve hetimore është paraqitur vetë në polici rreth tre orë më parë. I riu është transportuar fillimisht në spitalin e Sarandës për të marrë ndihmën e parë mjekësore, pasi kishte një plagë me armë zjarri në këmbë.
Gjatë qëndrimit në spital, Vogli është marrë në pyetje nga prokurorja e çështjes, ndërsa mësohet se pritet të transferohet drejt Spitalit të Vlorës për trajtim më të specializuar, por edhe për arsye sigurie.
Nga hetimet paraprake dyshohet se Kostandin Vogli ka qenë personi që kishte konflikt të hapur me 50-vjeçarinTori Ruci alias Viktor Ruci. Sipas të dhënave, pasi ka pikasur Rucin në lokalin e 66-vjeçarit Rexhep Ismaili, ai ka thirrur disa miq të tij dhe më pas ka nisur përplasja fizike mes palëve.
Konflikti, që fillimisht nisi me sende të forta, degradoi në shkëmbim zjarri. Hetuesit dyshojnë se Vogli është plagosur nga të shtënat me kallashnikov të Rexhep Ismailit. Pas kësaj, një prej të rinjve që ndodhej me të, i dyshuar si shtetasi Lulzim Tabaku, ka hapur zjarr me pistoletë në drejtim të 66-vjeçarit, duke i shkaktuar vdekjen.
31-vjeçari Vogli, rezulton person me precedentë penalë. Ai është proceduar më herët për “drejtim të parregullt të automjeteve”, ndërsa në gusht të vitit 2023 ishte shpallur në kërkim për “prodhim dhe shitje të lëndëve narkotike” si edhe për “kultivim të bimëve narkotike”. Ende nuk dihet nëse ai ka kryer dënim për këto vepra penale.
Ndërkohë, policia vijon hetimet për identifikimin dhe arrestimin e personave të tjerë të përfshirë në ngjarjen e rëndë.
