Qytetarë, ambientalistë dhe aktivistë të shoqërisë civile janë mbledhur këtë mbrëmje në Tiranë p&e...
AKTUALITET
Çfarë po gatuhet? Anëtari i KLP-së propozon ndryshimin e rregullores për zgjedhjen e kreut të ri të SPAK. Zbulohet e-maili
PiranjatPërditësimi i fundit 17 Shtator 2025, 13:35
Anëtari i KLP-së, Erind Mërkuri propozoi ndryshimin e rregullores për zgjedhjen e kreut të ri të SPAK-ut.
Në e-mail të siguruar nga Top Channel, Mërkuri ka kërkuar që drejtues i Prokurorisë së Posaçme të zgjidhet kandidati që merr shumicën e votave të anëtarëve të Këshillit të Lartë të Prokurorisë, duke futur termin “raund”, që rregullorja e vjetër nuk e ka. Ai propozoi ndërhyrjen e KLP mbi numrin e saktë të votave që “certifikojnë” kreun e ri të SPAK-ut.
“Në rast se asnjë nga kandidaturat nuk merr shumicën e votave të të gjithë anëtarëve të Këshillit, votimi i radhës të zhvillohet vetëm midis dy kandidatëve që kanë marrë më shumë vota. Në rast se ka më shumë se dy kandidatë me të njëjtin numër votash, atëherë përfshihet në votim edhe ky kandidat.
Votimi do të përsëritet ndërmjet këtyre kandidatëve derisa njëri nga kandidatët të sigurojë shumicën e votave të anëtarëve të Këshillit të Lartë të Prokurorisë”, shprehet zyrtarisht anëtari i KLP, Mërkuri.
Në mbledhjen e sotme KLP nuk e ka futur fare në diskutim këtë propozim, teksa hapi garën për kreun e ri të SPAK, duke lënë në fuqi rregulloren e vjetër. Kjo rregullore u miratua me ndryshime pas zgjedhjes së Dumanit dhe përcakton se kreu i SPAK-ut zgjidhet me shumicën e anëtarëve të KLP-së, ndërsa kuorumi i detyrueshëm për mbledhje plenare është 7 anëtarë nga 11 gjithsej.
Kujtojmë së paraditen e sotme (17 shtator), Këshilli i Lartë i Prokurorisë ka hapur zyrtarisht garën për drejtuesin e ri të SPAK, i cili do të zëvendësojë Altin Dumanin, mandati i të cilit përfundon në muajin dhjetor. Me 11 vota pro dhe asnjë kundër, u miratua projektvendimi që i hap rrugën zgjedhjes së drejtuesit të ri të Prokurorisë së Posaçme.
