Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
AKTUALITET
FOTOLAJM/ "Të rritet respekti dhe dashuria për njëri-tjetrin", besimtarët myslimanë kremtojnë sot Fiter Bajramin! Falin Namazin në sheshet dhe xhamitë e vendit
r.llPërditësimi i fundit 30 Mars 2025, 09:33
falja e namazit
TIRANË- Besimtarët myslimanë festojnë sot Fitër Bajramin, pas mbylljes së muajit të madhërishëm të Ramazanit, një muaj agjërimi dhe sakrifice. Mëngjesin e sotëm mijëra besimtarë janë mbledhur në sheshin “Skënderbej” në Tiranë për të kryer ritet dhe faljen e madhe të Namazit.
falja ne tirane
Në Lushnjë, qindra besimtarë kanë falur Namazin në sheshin qendror të qytetit. Faljen e namazit e drejtoi imami i xhamisë Lushnjë Alban Puka. Pas faljes, Myftiu i Lushnjës Gramoz Blliku mbajti fjalën e rastit si dhe uroi besimtarët për begati paqe e lumturi në familjet e tyre.
falja ne lushnje
Besimtarët myslimanë në Fier kanë falur në orën 7:30 të mëngjesit të sotëm Namazin e Fiter Bajramit në xhaminë e qytetit pas një muaji agjërimi. Ceremonisë së faljes i parapriu me fjalën e tij myftiu i Fierit Mikel Hazizolli, i cili përcolli mesazhin për më shumë respekt e dashuri ndaj njëri-tjetrit, dhe për më tepër besim duke e konsideruar njeriun si pasurinë më të madhe që ka krijuar Zoti.
falja ne fier
Në Vlorë, njerëzit e kanë kryer faljen e Namazit në Pallatin e Sportit për shkak të restaurimit të Xhamisë së Plumbit. Ceremonia nisi me leximin e Kuranit, duke sjellë qetësi dhe reflektim te të pranishmit. Myftiu i Vlorës, Ardit Hoxhlleku, falenderoi në fjalimin e tij komunitetin për përkushtimin e tyre në këtë muaj të shenjtë.
falja ne vlore
Mijëra besimtarë msylimanë në Elbasan u mblodhën në sheshin “Gensher” për faljen e namazit. Ceremoninë e faljes e drejtoi Myftiu Agim Duka. Ai tha gjatë fjalës së tij se kjo festë simbolizon sakrificën ndaj Zotit, prandaj kërkohet më shumë dashuri midis njerëzve.
falja ne elbasan
Në Shkodër, falja e Namazit u organizua në xhamitë e qytetit. Mesazhin e tij në festën e Fitër Bajramit, myftiu i Shkodrës e kishte për të rinjtë. Imam Muhamed Sytari kërkoi pendim të sinqertë tek Zoti. Ai tha se mëshira e Zotit është më e madhe se gjynahet tona. Myftiu i Shkodrës theksoi se duhet të parandalojmë të keqen në familjet dhe shoqëritë tona, si edhe kërkoi distancim nga haramet. Myftiu kishte një mesazh edhe për Gazën, ku tha se zullumi nuk e ka jetën e gjatë, pasi Zoti sheh gjithçka.
Beesimtarët myslimanë në Lezhë u mblodhën mëngjesin e sotëm në xhaminë e qytetit për të falur namazin e Fitër Bajramit, ndërsa rituali fetar u drejtua nga myftiu i Lezhës Sadetin Kotorri. Myftiu i Lezhës përcolli një mesazh të veçantë për besimtarët, duke theksuar rëndësinë e sakrificës, solidaritetit dhe mëshirës që përcjell muaji i shenjtë i ramazanit dhe Fiter Bajrami.
falja ne lezhe
Ndërkohë, edhe besimtarët në Kukës falën Fiter Bajramin në dy xhamitë e qytetit. Besimtarët përcollën urimet e tyre në këtë ditë të shënuar, ndërsa myftiu i Kukësit Emirjon Vathaj përcolli mesazhe paqeje e solidariteti.
falja ne kukes
Në qytetin e Bulqizës qindra besimtarë myslimanë mëngjesin e sotëm kanë kryer gjithashtu ritin e faljes së Fiter Bajramit. Ceremonia u drejtua nga Myftiu i xhamisë së Bulqizës Sejdin Strazimiri. Në fjalën e tij Strazimiri u shpreh se “sot është dita në të cilën festojmë, dhe se nuk ka Zot tjetër veç Allahut dhe se Muhamedi është i dërguari i Tij”.
Kremtimi i Fiter Bajramit në Berat nisi në orën 06:10, me faljen e namazit nga mijëra besimtarë të cilët u bashkuan në pedonalen kryesore të qytetit për të kryer ritet e faljes, duke u lutur për më shumë paqe, mbarësi dhe begati për veten, familjet e tyre dhe për gjithë botën. Ritet e faljes u udhëhoqën nga myftiu i qytetit të Beratit, Bilbil Talla, i cili gjatë fjalës së tij theksoi rëndësinë e përkushtimit dhe sakrificës që besimtarët bënë gjatë muajit të Ramazanit.
Gjithashtu edhe në Korçë qindra besimtarë myslimanë u mblodhën për të falur namazin e festës së shenjtë të Fitër Bajramit. Ceremonia nisi rreth orës 07:30 minuta në sheshin e xhamisë Iljas Bej Mirahori dhe drejtua nga myftiu Ledian Cikalleshi i cili në këtë ditë të shenjtë uroi të gjithë besimtarët.
falja ne korce
Fitër Bajrami është festa e cila bëhet pas mbarimit të muajit të madhërishëm të Ramazanit. Emri Fitër Bajram vjen nga fakti se myslimanët para ditës së Bajramit shpërndajnë lëmoshë, solidarizohen me të varfrit, dhe kështu në këtë mënyrë festojnë së bashku këtë festë.
