Ilir Meta ka reaguar në lidhje me gjyqin që po zhvillohet ndaj tij dhe bashkëshortes Monika Kryemadhi.
Me anë të një postimi n&...
AKTUALITET
I akuzuar si pronar fiktiv i kompanisë që merrte tendera nga ARRSH, Apeli liron nga burgu biznesmenin Ervis Lami
PiranjatPërditësimi i fundit 30 Prill 2026, 15:50
Apeli i GJKKO këtë të enjte ka liruar nga qelitë e paraburgimit biznesmenin Ervis Lami, i cili është i akuzuar në dosjen ndaj ish-drejtorit të ARRSH, Evis Berberi.
Lami, pronar i firmës “Daam”, akuzohet nga SPAK se merrte tendera të paracaktuar nga Autoriteti Rrugor Shqiptar. Prokuroria e Posaçme kërkoi 4 vite shërbim prove për Lamin, pasi ai bashkëpunoi me drejtësinë.
Dyshohet se gjatë drejtimit të ARRSH nga Evis Berberi, kompania “Daam” merrte tendera me vlera të mëdha, të cilat dyshohet se ishin të paracaktuara.
Njoftimi i Apelit të GJKKO-së:
Gjykata e Posaçme e Apelit për Korrupsionin dhe Krimin e Organizuar, me trup gjykues monokratik të përbërë nga gjyqtar Florjan Kalaja, sot më datë 30.04.2026, disponoi për çështjen penale nr. 119 akti, datë 22.04.2026 regjistrimi, mbi ankimin e ankuesit E.L, “Ankim kundër vendimit nr. 233 akti, datë 19.03.2026 të Gjykatës së Posaçme të Shkallës së Parë për Korrupsionin dhe Krimin e Organizuar, me objekt:
Zëvendësimin e masës së sigurimit “Arrest në burg”, dhënë ndaj shtetasit E.L me vendimin nr. 21, datë 13.03.2024 të Gjykatës së Posaçme të Shkallës së Parë për Korrupsionin dhe Krimin e Organizuar, në një masë tjetër më të butë, si ajo e “Detyrimi për t’u paraqitur në policinë gjyqësore” ose “Garancia pasurore”, në vlerën që gjykata mund të vlerësojë të drejtë për plotësimin e nevojave të sigurimit”, si vijon:
1. Ndryshimin e Vendimit 233 Regjistri Themeltar, datë 19.03.2026 të Gjykatës së Posaçme të Shkallës së Parë për Korrupsionin dhe Krimin e Organizuar.
2. Revokimin e masës së sigurimit “Arrest në burg” ndaj Z. E.L të caktuar me Vendimin nr. 21 Akti, datë 13.03.2024 dhe të verifikuar me Vendimin nr. 27, datë 16.03.2024 të Gjykatës së Posaçme të Shkallës së Parë për Korrupsionin dhe Krimin e Organizuar.
3. Urdhërohet lirimi i menjëhershëm i Z. E.L nga paraburgimi, nëse liria e tij personale nuk kufizohet për ndonjë shkak tjetër ligjor.
4. Urdhërohet Prokuroria e Posaçme Kundër Korrupsionit dhe Krimit të Organizuar për ekzekutimin e këtij vendimi.
5. Kundër këtij vendimi mund të ushtrohet rekurs në Gjykatën e Lartë brenda 45 ditëve, duke nisur ky afat nga dita e nesërme e njoftimit të vendimit të arsyetuar. U shpall në Tiranë, sot më datë 30.04.2026.
Hetimet ndaj Beberit
Evis Berberi, u arrestua me kërkesë të Prokurorisë së Posaçme që dyshon se ai është përfshirë në korrupsion dhe pastrim parash. Si bashkëpunëtor të tij në skemën korruptive në pranga ranë edhe dy biznesmenë, administrator të dy kompanive private, Valter Begaj dhe Ervis Lami për të njëjtat akuza. SPAK beson se të tre ata me anë të dy kompanive private të administruara së bashku, ligjërisht dhe indirekt, vunë në jetë skemën korruptive dhe të pastrimit të parave.
Në një njoftim zyrtar Prokuroria tha se i arrestuari Valter Begaj, administrator i kompanisë Net Group SHPK, përfitoi 3 tendera në kohën kur Berberi ishte Drejtor i Përgjithshëm për Efiçencën e Energjisë me vlerë totale 137.4 milionë Lekë dhe 3 tendera të tjerë, me vlerë 101.8 milionë Lekë, kur ai drejtonte ARRSH-n.
Për fitimin e këtyre tenderave, kjo kompani rezulton se i ka kaluar në rrugë bankare mbi 223 milionë Lekë kompanisë tjetër DAAM SHPK, për të cilën SPAK thotë se ishte në zotërim indirekt nga Evis Berberi, por administrohej nga i arrestuari tjetër Ervis Lami me bashkëortak Valter Begajn.
Hetuesit dyshojnë se këto vlera monetare janë investuar në pasuri të paluajtshme të blera nga kompania DAAM SHPK, duke çuar kështu në tjetërsimin e tyre me qëllim pastrimin e parave të përfituara nga korrupsioni.
