Deputeti i Partisë Demokratike Saimir Korreshi komentoi deklaratën e kryeministrit Edi Rama se prindërit e studentëve duhet të paguajn&...
AKTUALITET
Atentati ndaj Arjan Ndojit, shtyhet seanca për Bledar Polovinën dhe Amar Shkëmbin, kjo është arsyeja
PiranjatPërditësimi i fundit 11 Mars 2026, 14:08
Është shtyrë seanca në GJKKO, në ngarkim të të pandehurve Bledar Polovina dhe Amar Shkëmbi lidhur me atentatin te Mbikalimi i Shkozetit ku u plagos ish-prokurori Arjan Ndoja dhe humbi jetën shoferi i tij Andi Maloku.
Mësohet se në seancë, avokati i të pandehurit Amar Shkëmbi kërkoi nga gjykata të merrte në konsideratë përgjegjshmërinë e klientit të tij, që siç tha vuan nga probleme të shëndetit mendor.
Avokati tha se kanë bërë kërkesë në disa institucione e spitale për vizita nga të cilat është konstatuar se Shkëmbi nuk është në gjendje të mirë të shëndetit mendor. Si rrjedhojë, ai thotë se s’mund të vijojë seanca në themel pa praninë e tij.
“Kam konstatuar që Amar Shkëmbi nuk ishte në gjendje të mirë shëndetësore. Gjatë gjykimit paraprak unë kisha kërkuar informacion në spitalin e burgut dhe në spitalet e Tiranës ku ai kishte marrë trajtime dhe duke qenë se këto informacione kanë ardhur, jam i detyruar t’jua përcjell. Klienti im vuan nga probleme të shëndetit mendor që shfaqen në çdo rast. Kërkesën e kam të shoqëruar me informacionet mjekësore, kërkoj të verifikohet përgjegjshmëria e Amar Shkëmbit në lidhje me pjesëmarrjen e ose jo të tij në këtë procedim, në lidhje me sëmundjet mendore, nëse kjo sëmundje e pengon ose jo për të vijuar pjesëmarrjen e tij në ketë çështje. Janë elementë qe pa u verifikuar nuk mund të vijojë gjykimi. Në seancat paraprake nuk i kam pasur këto pretendime sepse nuk kisha informacionet nga institucionet përkatëse. Subjekti duhet të verifikohet nga ana e përgjegjshmërisë”, tha avokati i Amar Shkëmbit.
Ndërkohë në përgjigje prokurori i SPAK Adnan Xholi, deklaroi se s’ka kërkesë me shkrim për ekspertim dhe dokumentet mund të vlerësohen vetëm nga një grup ekspertësh.
“Nuk pashë që avokati të kishte një kërkesë specifike. Ne duhet të vazhdojmë gjykimin e themelit dhe nëse ka kërkesë respektive për kryerjen e një ekspertimi, është e drejtë e avokatit. Dokumentacioni që ka paraqitur nuk mund të vlerësohet nga ne si juristë, por duhet të shikohen nga ekspertë të mjekësisë ligjore. Nuk dëgjova a ka apo jo kërkesë nga avokati për ekspertim të shëndetit apo për zëvendësim mase. Nuk jemi ne kompetente të shprehemi për dokumentet shëndetësore”, u shprej prokurori Adnan Xholi.
Ndërkohë avokati i Amar Shkëmbit kërkoi kohë të formalizojë kërkesat me shkrim, kërkesë që u pranua nga gjykata. Kështu seanca e radhës është caktuar të mbahet në datë 2 prill ora 09.00.
