Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
AKTUALITET
Atentati ndaj gazetarit italian Sigfrido Ranucci, Kepi: Meloni dhe eksponentë të qeverisë së saj kanë qenë nxitës
PiranjatPërditësimi i fundit 20 Tetor 2025, 11:08
Më 17 tetor, gazetari italian Sigfrido Ranucci, moderator i emisionit investigativ "Report", u bë objekt i një atentati të mirëorganizuar, kur një mjet shpërthyes u vendos nën makinën e tij gjatë natës. Shpërthimi ishte aq i fuqishëm sa dëmtoi automjetin e Ranuccit, makinën e familjes së tij dhe banesën ngjitur.
Në një intervistë televizive, gazetarja Alba Kepi ka komentuar atentatin ndaj Ranuccit, duke sqaruar se, ndryshe nga disa interpretime të para, vetë gazetari italian e ka hedhur poshtë mundësinë e një motivi politik për sulmin. Ai ka orientuar hetimin drejt botës së krimit dhe rrjeteve mafioze që ai ka denoncuar gjatë investigimeve të tij.
Kepi tregoi se Ranucci ka marrë kërcënime konkrete në Shqipëri, duke përmendur një rast ku një avokat, që vepronte si ndërmjetës, e ka paralajmëruar për pasojat që mund të vinin nga hetimet e tij. "Ka qenë një kërcënim konkret, dhe ky ishte një sinjal që gazetarët që i drejtohen këtyre grupeve kriminale mund të përballen me pasojat më të rënda," tha Kepi.
Ajo gjithashtu tha se ka qenë dëshmitare e kërcënimeve që Ranucci ka marrë dhe disponon dokumente, mesazhe WhatsApp dhe dokumente të dorëzuara nga ai në Antimafia, ku ka kërkuar mbrojtje speciale që nga viti 2014, për shkak të rrezikut që ai ka hasur gjatë investigimeve të tij.
Alba Kepi:
Dje vetë Sigfrido e ka hedhur poshtë motivin politik, pasi, siç e dimë, ajo që ndodhi ngjalli debat të fortë politik mes forcave opozitare dhe mazhorancës, duke akuzuar qeverinë e djathtë si një ekstrem që privon lirinë e medias.
Ai e ka hedhur poshtë motivin politik, duke u orientuar më shumë rreth botës së krimit.
Më lejoni të them se Giorgia Meloni dhe eksponentët e qeverisë italiane disa herë publikisht kanë kritikuar emisionin “Report” dhe vetë Ranuccin, duke i vendosur nën shënjestër dhe duke u shprehur se një emision i shërbimit publik italian, siç është Rai3, e ka quajtur Shqipërinë “narkoshtet”.
Ky fjalim u mor në konsideratë nga kronikat mediatike italiane, duke bërë krahasime me akuzat e Melonit ndaj Ranuccit dhe dëshminë, intervistat e gazetarit ku thotë se pas disa hetimeve që ka bërë në Shqipëri ka marrë kërcënime nga Silano, një avokat që bënte ndërmjetësimin, duke e paralajmëruar se çfarëdo do të ndodhte.
Unë jam vetë një nga dëshmitarët e këtij kërcënimi që ai ka marrë, dhe disponoj të gjitha dokumentet, komunikimet në WhatsApp dhe dokumentet që Ranucci ka dorëzuar në Antimafia, pasi ngjarja ka ndodhur rreth një vit më parë. Pas publikimit dhe transmetimit të emisionit mbi narkotrafikun shqiptar, ai ka dorëzuar dokumentet atje, duke kërkuar mbrojtje më të kujdesshme, pra në mbrojtjen që ka prej vitit 2014.
Gjithashtu, kundëvështrimi im midis Ramës, lider i partisë së majtë, dhe Giorgia Meloni, lidere e së djathtës italiane, ka shumë ngjashmëri në raportimin e tyre me mediat.
As Rama dhe as Meloni nuk pranojnë të mbajnë konferenca shtypi me gazetarë të pakëndshëm, evitojnë konferencat. P.sh., në Itali nuk ka ndodhur më parë që një kryeministër të mos bëjë konferencë, sidomos me gazetarë ndërkombëtarë që kanë interes dhe dinë çfarë ndodh me çështje politike në vend. Ashtu edhe Rama ka të njëjtën qasje'.
