Gjykata e Tiranës ka caktuar masën e sigurisë detyrim paraqitjeje për 18 persona të arrestuar gjatë protestave në Tiran&eum...
AKTUALITET
"ILD dhe KLP të veprojnë urgjentisht"/ Dhoma Kombëtare e Avokatisë reagon ashpër për arrestimin e avokatit në Elbasan: E paprecedentë
PiranjatPërditësimi i fundit 19 Tetor 2025, 08:39
Dhoma Kombëtare e Avokatisë së Shqipërisë ka reaguar ndaj arrestimit të avokatit Ulian Barjami nga Policia e Elbasanit, ngjarje që ka ndodhur vetëm një ditë pas një përplasjeje të tij me prokurorin Gjergji Ceka gjatë një seance gjyqësore.
Ngjarja e pazakontë nisi pas një deklarate të avokatit Barjami në sallën e gjyqit, ku ai kundërshtoi një provë që e konsideroi të falsifikuar, duke paralajmëruar një kallëzim penal ndaj prokurorit të çështjes. Ky veprim u interpretua më pas si “kanosje ndaj një personi zyrtar”, çka çoi në ndalimin dhe më pas arrestimin e tij.
Në një deklaratë publike, Dhoma e Avokatisë e cilëson arrestimin si një shkelje të rëndë të të drejtave të avokatëve dhe të fjalës së lirë në sallën e gjyqit. Ajo paralajmëron se një veprim i tillë krijon një precedent të rrezikshëm për ushtrimin e profesionit të avokatit, i cili sipas saj ka për detyrë të mbrojë të drejtat dhe liritë e qytetarëve, pavarësisht palëve në proces.
Reagimi i plotë:
Dhoma Kombëtare e Avokatisë së Shqipërisë dënon me forcë arrestimin e avokatit Ulian Barjami nga Policia e Elbasanit.
Nga sa Dhoma e Avokatisë ka marrë dijeni, rezulton se një përballje e armëve të barabarta në sallën e gjykimit, sipas ligjit, ka përfunduar në një abuzim të atributeve të prokurorit, duke mos pranuar debatin gjyqësor, por duke urdhëruar prangosjen e avokatit Ulian Barjami, anëtar i Dhomës së Avokatisë Tirnaë.
Qëndrimi i Dhomës së Avokatisë së Shqipërisë
Kemi të bëjmë me arrestimin e avokatit për shkak të deklarimeve të tij në kuadrin e mbrojtjes në sallën e gjyqit, duke u trajtuar deklarata e tij, se do të bëjë kallëzim për falsifikim provash kundër prokurorit, si kanosje dhe kundërshtim i prokurorit.
Ngjarje kjo e paprecedentë, ku një avokati i hiqet liria për shkak të fjalës së lirë në sallën e gjykimit, ku ai shpreh mendimin për falsitetin e provës dhe përgjegjësinë që, sipas avokatit, duhet të mbajë autori i falsifikimit, që në këtë rast është prokurori.
Dhoma e Avokatisë u bën thirrje Inspektorit të Lartë të Drejtësisë, Këshillit të Lartë të Prokurorisë si dhe Prokurorisë së Përgjithshme të veprojnë urgjentisht për këtë rast flagrant arbitrariteti dhe shkeljeje të hapur të ligjit.
Kjo, pasi Dhoma, duke u bazuar në kuadrin ligjor dhe Kushtetutën e Shqipërisë, ende beson se jemi Republika e Shqipërisë – një shtet me drejtësi të bazuar në prova dhe fakte, dhe jo në një “Republikë të Prokurorëve”.
Kryetari i Dhomës së Avokatisë së Shqipërisë Prof. Dr. Maksim Haxhia
