Në fund të vitit 2025, numri i mjeteve rrugore të regjistruara (me status aktiv ose të çregjistruara përkohësisht) arriti n...
AKTUALITET
“Infiltrimi i porteve nga krimi i organizuar", Europol kap 35 ton kokainë në portet e BE-së, arrestohen 6 trafikantë, mes tyre një shqiptar
M.B.Përditësimi i fundit 18 Qershor 2024, 19:55
Foto ilustruese
EUROPA- Një sasi prej 35 ton kokainë ,e cila ishte destinuar për në Bashkimin Europian, është sekuestruar nga prilli deri në shtator 2023 prej autoriteteve në Gjermani, ndërsa Europol në bashkëpunim me policitë lokale në Belgjikë, Ekuador dhe Gjermani, njofton se shkatërroi rrjetin e trafikantëve.
“Rrjeti kriminal vepronte nga Gjermania. Logjistika e tyre, dyshohet se organizohej përmes përfshirjes së një numri të madh kompanish fantazmë, duke përfshirë kompani transporti dhe bashkëpunëtorë në krim, si personel administrativ dhe shoferë”, thuhet në njoftimin e Europol.
Aksioni për goditjen e grupit u zhvillua në 31 maj dhe 5 qershor në Këln dhe Hamburg dhe solli ndër të tjera arrestimin e 6 personave. Gjatë kontrollit në 24 shtëpi u sekuestruan makina luksoze, bizhuteri, para cash, paisje elektronike dhe dokumente të ndryshme. Euopol vë në dukje se rrejti i trafikut që sillte drogë nga amerika latin shfrytëzonte portet e mëdha të Detit të Veriut, për të futur narkotikun në BE.
“Ky operacion është pjesë e përpjekjeve të shteteve anëtare të BE-së dhe Europol-it për të dhënë një përgjigje ndaj rrjeteve kriminale më kërcënuese aktive në BE, veçanërisht atyre që veprojnë në portet kryesore të BE-së”, thuhet në njoftim.
Prej kohësh tashmë Bashkimi Europian është në alarm për shkak të rritjes së trafikut të drogës përmes porteve të mëdha si Roterdami, Antverp dhe Hamburg. Një studim i autoriteteve në Gjermani, Belgjikë dhe Holandë i publikuar në janar 2024, për rreziqet dhe sigurinë në këto porte, zbuloi ndër të tjera një sërë pikash të dobëta, që po shfrytëzoheshin nga trafikantët për të trafikuar drogën jashtë këtyre porteve.
Studimi vë në dukje se mënyra e operimit e grupeve të trafikut të narkotikëve ishte përditësuar dhe se të paktën prej vitit 2018 ata ishin në gjendje të përdornin kodet e identifikimit të kontejnerëve të transportit për të trafikuar drogën.
“Në vitin 2018, autoritetet ligjzbatuese të portit të Roterdamit zbuloi një MO (metodë) të re të përdorur nga rrjetet e kriminelëve të përfshirë në trafikimi i mallrave të paligjshme: falsifikimin dhe përdorimin e kodeve të referencës së kontejnerëve”, thuhet në raport.
Analizat që autoritetet portuale në Antverp dhe Roterdam bënë bazuar në këto të dhëna zbuloi një imazh të frikshëm të përmasave të trafikut përmes kësaj metode. “Autoritetet portuale të Antverpit dhe Roterdamit vlerësojnë se qindra ton drogë janë trafikuar përmes porteve duke përdorur këtë mënyrë”, thuhet në raport.
Analiza e Europol vë në dukje se infiltrimi i porteve nga rrjetet e trafikut të drogës është një prej kërcënimeve të mëdha për ekonominë në BE. “Infiltrimi i porteve nga krimi i organizuar është një kërcënim i madh për ekonominë legjitime dhe sigurinë e BE-së”, thuhet në raport.
Raporti shpjegon se trafikantë blejnë akses te kodet e referencës për kontejnerët në të cilët ata vendosin drogën përmes lidhje korruptive me kompanitë e transportit dhe kjo u lejon atyre që t'i tërheqin kontejnerët, që veç drogës transportojnë edhe mallra legjitimë, si të ishin të tyret me të mbërritur në port./ BIRN
