Kancelari i Gjermanisë, Friedrich Merz , ka akuzuar partinë e ekstremit të djathtë Alternative für Deutschland (AfD) se kërkon &...
AKTUALITET
Situata në Zvërnec/ Komisioni Europian paralajmëron Shqipërinë: Liria e tubimit paqësor, pjesë kyçe e rrugës së Shqipërisë drejt BE-së
PiranjatPërditësimi i fundit 1 Qershor 2026, 19:46
Një mesazh i qartë për Tiranën se respektimi i të drejtave të minoritetit kombëtar grek dhe mbrojtja e zonave me ndjeshmëri mjedisore lidhen drejtpërdrejt me rrugën evropiane të vendit, dërgon Komisioni Europian, pas incidenteve serioze që ndodhën mbrëmjen e së shtunës në zonën e Zvërnecit, gjatë të cilave u plagos një shtetas grek.
“Respektimi i të drejtave dhe vlerave themelore, përfshirë lirinë e tubimit paqësor, është një element kyç i rrugës evropiane të Shqipërisë”, thekson Komisioni.
Duke iu përgjigjur një pyetjeje të “Kathimerini”, zëdhënësi përgjegjës Guillaume Mercier deklaroi se Komisioni Europian “po ndjek nga afër zhvillimet në zonën e mbrojtur Pishe Poro – Narta”.
Shqetësimet në raportin vjetor të Komisionit
Ai kujtoi se raporti vjetor i Komisionit për vitin 2025 kishte shënuar tashmë shqetësime për zgjatjet e përsëritura të ligjit shqiptar për investimet strategjike, duke theksuar se këto “vazhdojnë të ngrenë shqetësime lidhur me ndikimet e mundshme mjedisore, veçanërisht në zonat e mbrojtura”.
Vëmendje e veçantë i kushtohet edhe çështjes së të drejtave themelore, në lidhje me incidentet serioze të së shtunës, ku u plagos një shtetas grek. Mercier theksoi se “respektimi i të drejtave dhe vlerave themelore, përfshirë lirinë e tubimit paqësor, është një element kyç i rrugës evropiane të Shqipërisë”.
Duke iu referuar projektit të diskutueshëm të investimit, zëdhënësi i Komisionit theksoi se, në kuadër të kritereve për mbylljen e Kapitullit 27 për Mjedisin dhe Ndryshimet Klimatike, Shqipëria duhet të përafrohet plotësisht me ligjin europian dhe se “standardet e BE-së duhet të merren plotësisht në konsideratë në këtë projekt”.
Zona Pishe Poro – Narta ndodhet në qendër të vlerësimit të Shqipërisë nga Komisioni Europian për aftësinë e saj për të mbrojtur zonat ekologjikisht të ndjeshme, në përputhje me standardet evropiane.
Vendi ka propozuar përfshirjen e kësaj zone në rrjetin Emerald, i cili shërben si pararendës i Natura 2000 për vendet kandidate, gjë që i jep rëndësi të veçantë mënyrës së menaxhimit të saj.
Për më tepër, harmonizimi i plotë me direktivat europiane për habitatet dhe shpendët është një kusht kyç për mbylljen e Kapitullit 27, ndërsa Shqipëria duhet të shfuqizojë dispozita që konsiderohen të papajtueshme me acquis communautaire dhe të ndërpresë regjimin aktual të investimeve strategjike të vitit 2015.
Nga Brukseli përcillet një mesazh i qartë se Shqipëria duhet të shmangë veprime që mund të minojnë përmbushjen e kritereve të integrimit, të sigurojë studime të plota të ndikimit mjedisor kur kërkohet dhe të zbatojë plotësisht legjislacionin mjedisor të BE-së.
Në këtë kuadër, çështja e Zvërnecit po vendoset nën “mikroskopin” e Komisionit Europian, pasi prek çështje të shtetit të së drejtës, mbrojtjes së minoriteteve, të drejtave të pronës dhe qeverisjes mjedisore – fusha që janë në thelb të procesit të integrimit të Shqipërisë dhe do të vlerësohen gjatë negociatave./Kathimerini
