Ndërsa vendet që mbështesin Kievin po shtojnë ndihmat e tyre ushtarake, Moska flet për një afrim të mundshëm me SHBA-n...
POLITIKE
Pasi shkatërroi industrinë e naftës dhe lejoi kontrabandën, Rama tallet me shqiptarët: Do ngremë kompani me Emiratet
PiranjatPërditësimi i fundit 1 Prill 2026, 21:37
Për 13 vite që ishte në pushtet, Edi Rama ia doli të shkatërrojë industrinë e naftës në vend.
Shqipëria njihet si vendi me fushat më të mëdha naftëmbajtëse në tokë, por Rama çoi për skrap edhe ato pak mbetje që kishin mbetur nga kompania shtetërore e naftës, ARMO.
Ndërkohë nga ana tjetër, gjatë keqqeverisjes së Ramës lulëzoi kontrabanda e naftës në vend në nivele të paimagjinueshme më përpara.
Të gjitha këto ndodhnin në një kohë kur Edi Rama u shiste shqiptarëve përralla sheikësh me naftën që do dilte lumë në Shpirag.
Por realiteti i hidrokarbureve u përplas edhe më brutalisht në fytyrën e shqiptarëve gjatë javëve të fundit.
Shqiptarët u bënë populli që e ndjen më shumë krizën e naftës nga lufta në Lindjen e Mesme për shkak të taksave të shumta të qeverisë Rama mbi karburantet.
E megjithatë Rama vazhdoi talljen me shqiptarët sot njësoj si me Shpiragun, kur u tha se do ngrejë një kompani shtetërore për naftën.
Madje kjo kompani do bëjë gjurmimin që të mos lejojë kontrabandën e naftës, që ka rrjedhur nën hundën e Ramës për më shumë se një dekadë.
“Ne sot kemi problem naftën që është goditur në çmim nga kriza, por edhe një problem përtej nesh. Ajo që po ndodh në Ngushticën e Hormuzit e ka ngritur çmimin shumë gjithandej, më thanë edhe disa miq në Gjermani, tmerr. Ne do hyjmë në tregun e naftës me faktor shtetëror, me kompani publike, në atë kohë s’kishte lidhje me luftën, por pse tani? Sepse konsumatorët tanë nuk do paguajnë më shumë dhe rezervat, edhe kjo është koincidencë sepse ligji i ri për rezervën, është bërë më përpara. Kemi pasur edhe një naftë që dikur markohej, ngjyrosej me element kimik, që markohej, por ajo ishte një bojë që sajohej e prodhohej kollaj dhe ndikonte te kontrabanda. Tani kemi krijuar një kompani, që e ka edhe shteti në Emiratet e bashkuara Arabe, punë një apo dy muajsh sepse është në fazën finale, do nxjerrim një bojë dhe ngjyrues e pamanipulueshëm”, tha Rama.
Ai tha se një pjesë e naftës është jashtë radarëve të shtetit dhe kontrabandohet duke shkaktuar dëm ekonomik, kurse distributorët fitojnë më shumë se çfarë duhet. Sipas tij, ky ligj dhe kompani e re do të rregullojë jo vetëm tregun, por edhe çmimin që të mos jetë abuziv.
“Ka një sasi nafte që është jashtë radarëve të shtetit. Por ka edhe një tjetër naftë që është ajo tranzit, që kalon territoret e tjera, por edhe brenda ku ka naftë ilegale. Shteti shqiptar ka shumicën e aksioneve, pjesën tjetër e kanë Emirateve. Dikur ndiqej nafta me makina, sot e ndjekim me anë të markimit. Kompania do arrijë qëllimin që të jetë furnizues në treg, të përcaktojë rregullat e lojës që të mos jetë çmim arbitrar, por i bazuar te bursa, e i jep distributorëve të fitojnë, por jo të stërfitojnë”, vijoi ai.
