Pasuri me vlerë 77 milionë lekë janë vendosur nën sekuestro preventive në kuadër të hetimit të SPAK për traf...
AKTUALITET
KSHM i bashkohet SafeJournalists: Të dënohen personat që sulmojnë gazetarët investigativë në Shqipëri
PiranjatPërditësimi i fundit 15 Shtator 2025, 13:43
KSHM i bashkohet Rrjetit SafeJournalists për të dënuar me forcë serinë e fundit të sulmeve të dhunshme dhe kërcënimeve ndaj gazetarëve në Shqipëri. Brenda pak më shumë se një jave, janë regjistruar tre incidente të ndara, duke shënuar një rritje alarmante të dhunës dhe intimidimit që synon gazetarët.
Më 13 shtator 2025, gazetari Edon Kuçi dhe një kameraman nga emisioni hetimor televiziv Piranjat u sulmuan ndërsa po raportonin nga stadiumi “Selman Stërmasi” në Tiranë. Kuçi u kërcënua verbalisht me rrëmbim dhe pengmarrje nga Sinan Idrizi, aksioneri kryesor i Air Albania dhe presidenti i FC Flamurtarit, siç shihet në pamjet video të ngjarjes. Gjatë të njëjtit incident, Refik Halili, presidenti i FC Tirana, mori me forcë telefonin e Kuçit, duke ndërhyrë drejtpërdrejt në punën e tij gazetareske siç raportohet nga gazetari dhe siç shihet në pamjet video.
Më 11 shtator 2025, gazetarja Lorena Resulaj dhe kameramani Nertil Mataj u sulmuan fizikisht ndërsa po raportonin nga një bar në rrugën “Islam Alla” në Tiranë. Pronari i barit dyshohet se kërcënoi dhe goditi me grushte të dy punonjësit e mediave pasi ata refuzuan të largoheshin gjatë raportimit. Policia më vonë arrestoi të dyshuarin dhe çështja u dërgua në prokurori për hetime të mëtejshme.
Më 5 shtator 2025, gazetarët Domenika Bajraktari dhe Enkel Elezi nga programi hetimor televiziv STOP u sulmuan në Kamëz ndërsa filmonin një histori me interes publik. Sulmi synonte të pengonte drejtpërdrejt detyrat e tyre profesionale dhe t’i ndalonte ata të raportojnë. Autori u arrestua dhe më pas u la me “detyrim paraqitje” nga gjykata.
KSHM mirëpret veprimin e shpejtë të policisë në dy raste, duke arrestuar autorët e sulmeve. Megjithatë, ne kërkojmë të njëjtën vendosmëri dhe përgjegjshmëri kur përfshihen aktorë të fuqishëm, siç është rasti i kërcënimeve dhe intimidimit ndaj Kuçit dhe ekipit të Piranjat. Këto akte të përsëritura dhune dhe intimidimi janë të papranueshme dhe përfaqësojnë një ndërhyrje të drejtpërdrejtë në punën gazetareske, si dhe një shkelje të së drejtës së qytetarëve për t’u informuar mbi çështje të interesit publik.
KSHM u bën thirrje autoriteteve shqiptare të kryejnë hetime të menjëhershme, të plota dhe të pavarura në të tre incidentet dhe të sigurojnë që autorët të ndiqen penalisht dhe të mbahen përgjegjës pa vonesë, përfshirë kur përfshihen aktorë me ndikim dhe të fuqishëm. Ne gjithashtu nxisim institucionet të sigurojnë masa ndjekjeje dhe mbrojtjeje për gazetarët që janë sulmuar ose kërcënuar. Është jetike të forcohen mekanizmat institucionalë për mbrojtjen e gazetarëve dhe të garantohet qasje e sigurt për gazetarët në hapësirat dhe ngjarjet publike pa pengesa ose intimidim. Në këtë aspekt, ne përsërisim thirrjen tonë për krijimin e një mekanizmi të shpejtë reagimi për të siguruar që gazetarët nën kërcënim të marrin mbrojtje të menjëhershme dhe efektive.
KSHM solidaritzohet plotësisht me kolegët tanë Edon Kuçi, Lorena Resulaj, Nertil Mataj, Domenika Bajraktari, dhe Enkel Elezi.
Çdo sulm ndaj gazetarëve është një sulm ndaj demokracisë, interesit publik dhe të drejtave themelore të njeriut.
