TIRANA- Banorët e tre pallateve pranë shkollës “Emin Duraku” ku po ndërtohet një kullë 16-katëshe i kanë drejtuar një letër publike kryeministrit Edi Rama. Në rastin e këtij ndërtimi përmendet dhe emri i ish-ministres së Kulturës Elva Margaritit si dhe i dajës së saj Agron Lufit, profesor i arkitekturës.
Në letrën drejtuar Ramës banorët kanë kërkuar ndërprerjen e menjëhershme të punimeve, deri në shqyrtimin përfundimtar të çështjes në rrugë ligjore, rishikimin dhe anulimin e lejes së ndërtimit, hetimin e plotë administrativ, për të verifikuar të gjithë procedurën e lëshimit të lejes dhe çdo ndryshim të mundshëm në projektin e shkollës “Emin Duraku” dhe garanci për sigurinë si banorë dhe për kushtet e mësimit të fëmijëve të shkollës “Emin Duraku”.
Banorët i kanë parashtruar Ramës argumentet e tyre se ky projet 16-katësh rrezikon jetën dhe sigurinë e tyre dhe të nxënësve. Ata gjithashtu ngrenë dyshimet për shkeljen e ligjeve urbanistike dhe standardeve të ndërtimit si dhe për korrupsion dhe klientelizëm.
"Nga dokumentet dhe informacionet që kemi siguruar, në këtë projekt janë të përfshirë individë me pushtet dhe lidhje politike, përfshirë emra të njohur në administratë. Veçanërisht, përmendet roli i një ish-Ministreje të Kulturës dhe lidhjet e saj familjare e profesionale me firmën ndërtuese—gjë që na bën të besojmë se leja e ndërtimit është dhënë përmes procedurave që s’janë as normale as transparente. Manipulimi i projektit të shkollës “Emin Duraku”
Në lejen e ndërtimit paraqitet shkolla e vjetër “Emin Duraku”. Firma ndërtuese ka pritur për rreth një vit, deri në përfundimin e ndërtimit të shkollës së re, për të krijuar një “distancë” më të madhe nga shkolla ekzistuese. Ekziston mundësia e fortë që plani fillestar i shkollës të jetë ndryshuar me qëllim, për të lënë hapësirë të lirë artificiale për këtë kullë. Një manovër e tillë—nëse vërtetohet—nuk mund të ndodhë pa bashkëpunimin e zyrtarëve dhe projektuesve, duke cenuar rëndë interesin publik", shkruajnë banorët.
Në mesin e kërkesave të tyre banorët shtojnë dhe kompensimin e pronarëve të truallit, përfshirë edhe ish-ministren e Kulturës, por vetëm në përputhje me ligjin dhe standardet e interesit publik, në vend që ky projekt i rrezikshëm të justifikohet si “zhvillim”. Ata kërkojnë dhe kthimin e sheshit midis pallateve dhe shkollës në një lulishte, ku komuniteti të mund të investojë vetë, për të përmirësuar mjedisin dhe cilësinë e jetës së banorëve dhe nxënësve. Gjithashtu kërkojnë garanci ligjore që vendimet e KKT-së të mos përdoren për të anashkaluar kriteret urbanistike, në mënyrë që asnjë komunitet tjetër të mos përballet me rrezikun dhe padrejtësinë me të cilat po përballen ata.
LETRA:
KRYEMINISTRIT TE REPUBLIKES SE SHQIPERISE
Z. Edi RAMA
Tirane, 31 Mars, 2025
I nderuar Z. Kryeministër Edi Rama,
Ne, banorët e tre pallateve në sheshin pranë shkollës “Emin Duraku” në Tiranë, ju drejtohemi me këtë letër publike për të shprehur shqetësimin dhe indinjatën tonë të thellë në lidhje me projektin e ndërtimit të një kulle 16-katëshe, vetëm disa metra larg banesave tona dhe ambienteve të shkollës. Me këtë rast, dëshirojmë t’ju sjellim në vëmendje sa vijon:
Rreziku për jetën dhe sigurinë e banorëve dhe nxënësve
Kulla 16-katëshe rrezikon drejtpërdrejt jetën dhe sigurinë tonë si banorë, si dhe të qindra nxënësve të shkollës “Emin Duraku”. Dy prej ndërtesave tona janë ndërtuar në vitin 1938 dhe nuk kanë strukturë që të përballojë gërmimet dhe themelet masive të një kulle kaq të lartë. Ndërtimi në këtë hapësirë shumë të kufizuar krijon rrezik real për çarje ose shembje. Po ashtu, shkolla “Emin Duraku” mund të pësojë dëmtime serioze nga punimet dhe zhvillimet e ardhshme, duke vënë në rrezik sigurinë e qindra fëmijëve që mësojnë çdo ditë aty.
Shkelja e ligjeve urbanistike dhe standardeve të ndërtimit
Ky projekt ka marrë leje ndërtimi në kundërshtim me çdo normë urbanistike të njohur deri më tani. Kërkesat e mëparshme për ndërtim në këtë vend janë refuzuar pikërisht për shkak të afërsisë me tre pallatet tona dhe me shkollën “Emin Duraku”. Tani, papritur, është miratuar një projekt 16-katësh, i cili është vetëm 7 metra larg pallateve ekzistuese dhe pranë shkollës, duke injoruar distancat ligjore dhe standardet bazë të sigurisë.
Dyshimet për korrupsion dhe klientelizëm
Nga dokumentet dhe informacionet që kemi siguruar, në këtë projekt janë të përfshirë individë me pushtet dhe lidhje politike, përfshirë emra të njohur në administratë. Veçanërisht, përmendet roli i një ish-Ministreje të Kulturës dhe lidhjet e saj familjare e profesionale me firmën ndërtuese—gjë që na bën të besojmë se leja e ndërtimit është dhënë përmes procedurave që s’janë as normale as transparente. Manipulimi i projektit të shkollës “Emin Duraku”
Në lejen e ndërtimit paraqitet shkolla e vjetër “Emin Duraku”. Firma ndërtuese ka pritur për rreth një vit, deri në përfundimin e ndërtimit të shkollës së re, për të krijuar një “distancë” më të madhe nga shkolla ekzistuese. Ekziston mundësia e fortë që plani fillestar i shkollës të jetë ndryshuar me qëllim, për të lënë hapësirë të lirë artificiale për këtë kullë. Një manovër e tillë—nëse vërtetohet—nuk mund të ndodhë pa bashkëpunimin e zyrtarëve dhe projektuesve, duke cenuar rëndë interesin publik.
I nderuar Z. Kryeministër,
Ne i drejtohemi institucionit tuaj si autoriteti më i lartë ekzekutiv në vend, me kërkesën urgjente për:
o Ndërprerjen e menjëhershme të punimeve, deri në shqyrtimin përfundimtar të çështjes në rrugë ligjore.
o Rishikimin dhe anulimin e lejes së ndërtimit.
o Hetimin e plotë administrativ, për të verifikuar të gjithë procedurën e lëshimit të lejes dhe çdo ndryshim të mundshëm në projektin e shkollës “Emin Duraku”.
o Garanci për sigurinë tonë si banorë dhe për kushtet e mësimit të fëmijëve të shkollës “Emin Duraku”.
Dëshirojmë të ngremë publikisht edhe dy çështje të rëndësishme:
Së pari: Shkelja e parimeve themelore dhe dyshimet për antikushtetutshmëri Konsultimet tona me ekspertë ligjorë ngrejnë dyshime serioze mbi bazën ligjore ku është mbështetur Këshilli Kombëtar i Territorit (KKT) për të lëshuar lejen e ndërtimit, veçanërisht duke i dhënë këtij institucioni kompetenca të pakufizuara që shkelin kriteret e përcaktuara për distancat minimale ndërmjet godinave. Ne mendojmë se ndryshimet ligjore të miratuara me ligjin nr. 42/2019 u japin mundësi organeve si KKT-ja të veprojnë jashtë çdo standardi të përcaktuar në ligj sa i takon kushteve të zhvillimit urban. Kjo do të thotë se:
• Nuk ekzistojnë kritere të qarta lidhur me distancat mes ndërtesave, intensitetin e ndërtimit ose kushtet e tjera të sigurisë.
• KKT-ja mund të miratojë rregullore të veçanta për rastet në kompetencë të saj, pa pasur asnjë kornizë ligjore ose kontroll të pavarur për të vlerësuar nëse këto rregullore janë në përputhje me interesin publik.
• Ky diskrecion i pakufizuar i KKT-së bie ndesh me parimet e shtetit të së drejtës, duke mundësuar abuzime dhe favorizime që shkelin parimin kushtetues të barazisë së qytetarëve para ligjit.
Së dyti: Procesi i dyshimtë dhe favorizimi i individëve të lidhur me qeverinë
Sipas informacioneve që kemi siguruar, rezulton se:
• Vendimi i KKT-së mbështet interesa private të dyshimta, të lidhura me zyrtarë ose ish-zyrtarë të lartë, në kurriz të sigurisë së banorëve dhe fëmijëve në shkollë. Konkretisht, pronarët e truallit, midis tyre ish-Ministrja e Kulturës si dhe personazhe të njohur nga firma ndërtuese (Gentian Parruca dhe Fation Alliu).
• KKT-ja ka mbështetur interesin privat të këtyre katër individëve kundrejt interesit të qindra qytetarëve, duke cenuar jetën dhe sigurinë e komunitetit, si dhe interesin publik.
• Projekti është miratuar në bazë të një ligji të ri — të konsideruar antikushtetues — i cili i jep KKT-së fuqi të pakufizuara për të anashkaluar distancat urbane.
• Ky akt ligjor fshihet pas termit “strategjik”, pa asnjë shpjegim të qartë se si një kullë 16-katëshe mund të jetë me dobi “strategjike” për komunitetin.
I nderuar Z. Kryeministër, ne besojmë se KKT-ja e ka dhënë këtë leje ndërtimi të rrezikshme për komunitetin tonë pa dijeninë ose pa vullnetin tuaj.
Jemi të bindur se firma ndërtuese e ka zgjedhur pikërisht fushatën zgjedhore si momentin “e përshtatshëm” për abuzime, duke menduar se: Autoritetet do të kenë vëmendje të ulët gjatë këtij intervali, të zëna me procesin zgjedhor. Vullneti për të ndërhyrë mund të jetë i dobët, duke krijuar kushtet ideale për të avancuar një projekt të debatueshëm dhe të rrezikshëm.
I nderuar Z. Kryeministër,
Në emër të banorëve dhe në interes të qindra nxënësve të shkollës “Emin Duraku”, kërkojmë:
1. Shfuqizimin e menjëhershëm të lejes së ndërtimit, e cila është dhënë në kundërshtim flagrant me normat urbanistike, me Kushtetutën dhe me vendimet gjyqësore ekzistuese.
2. Kompensimin e pronarëve të truallit — përfshirë edhe ish-ministren e Kulturës — por vetëm në përputhje me ligjin dhe standardet e interesit publik, në vend që ky projekt i rrezikshëm të justifikohet si “zhvillim”.
3. Kthimin e sheshit midis pallateve tona dhe shkollës në një lulishte, ku komuniteti të mund të investojë vetë, për të përmirësuar mjedisin dhe cilësinë e jetës së banorëve dhe nxënësve.
4. Garanci ligjore që vendimet e KKT-së të mos përdoren për të anashkaluar kriteret urbanistike, në mënyrë që asnjë komunitet tjetër të mos përballet me rrezikun dhe padrejtësinë me të cilat po përballemi ne.
I nderuar Z. Kryeministër,
Ne ju besojmë shumë kur flisni në këto ditë zgjedhore për “pasaportën europiane”. Të gjithë e duam këtë pasaportë
Ne besojmë se ndajmë të njëjtën pikëpamje: pasaporta europiane nënkupton standardet europiane që dëshirojmë t’i shohim në Tiranë dhe kudo në vend. Por, sipas kësaj leje ndërtimi për kullën 16-katëshe, “standardet” janë klienteliste, bazohen në korrupsion dhe shkelin ligjet e Kushtetutën.
Apeli ynë është i thjeshtë dhe i drejtpërdrejtë: mos mbështetni interesat e tre a katër personave dhe babëzinë e tyre financiare, por qëndroni në mbrojtje të interesit publik dhe të së ardhmes Europiane të kryeqytetit tonë.
Ne jemi të vendosur të ndjekim rrugët ligjore dhe procedurale, por kemi ende besim se institucionet e shtetit—me Ju në krye—do të vendosin drejtësi dhe do të garantojnë sigurinë e qytetarëve.
Me respekt dhe me shpresë për ndërhyrjen tuaj urgjente,
në sheshin pranë shkollës “Emin Duraku”
edi rama tirana elva margariti
Artikuj te sugjeruar
E.D
AKTUALITET
7 Prill18:16
“Ai duhet të kalbet në burg”! Babai i Ilarias në varrimin e së bijës: Vajza ime nuk meritonte të përfundonte kështu! Duam drejtësi!
ITALI- Babai i Ilaria Sulës, Flamur Sula kërkoi drejtësi në fund të varrimit të së bijës në Terni. Babai i 2...
E.D
AKTUALITET
7 Prill17:55
Doli për të gjuajtur në malin e Pashtrikut dhe nuk u kthye më në banesë, gjendet pa shenja jete 27-vjeçari
PASHTRIK- 27-vjeçari që u zhduk pasi doli për të gjuajtur në malin e Pashtrikut, është gjetur pas shumë orë...
E.D
AKTUALITET
7 Prill17:34
Shkatërrohet grupi italo-shqiptar i drogës/ Në pranga nëntë persona, policia zbulon se mbledhjet zhvilloheshin brenda një pularie
ITALI- Autoritetet italiane kanë zhvilluar një operacion në provincën e Modenës dhe Romës, ku si pasojë kanë rën&...
M.B.
AKTUALITET
7 Prill17:13
Kërkon të votohet në një sondazh/ Autoriteti Kombëtar për Sigurinë Kibernetike: Kujdes, mesazhi që po shpërndahet në Whatsapp është mashtrues
TIRANA- Autoriteti Kombëtar për Sigurinë Kibernetike (AKSK) u ka bërë thirrje qytetarëve që të kenë kujdes&e...
M.B.
AKTUALITET
7 Prill15:38
Nga shoqëritë fiktive te pasuritë e paluajtshme e Forex/ Raporti i AIF: Ja 13 tipologji si pastrohen paratë
TIRANA- Pasuritë e paluajtshme, call center-at mashtruese me aktivitet FOREX apo mashtrimet me karta bankare dhe shoqëritë fiktive kanë qe...
AKTUALITET
7 Prill15:30
Inceneratori i Tiranës/ GJKKO do të japë vendimin për të pandehurit me 16 prill, mes të akuzuarve edhe ish-ministri Lefter Koka
TIRANË- Gjykata e Posaçme do të japë vendimin për të pandehurit e dosjes së Inceneratorit të Tiranës ...
n.f
AKTUALITET
7 Prill14:52
Përdorimi i shërbimeve celulare, rritje e dobët në tremujorin e fundit 2024
TIRANË- Përdorimi i shërbimeve të komunikimit celular shënoi rritje të dobët në tremujorin e fundit të vitit t&eu...
n.f
AKTUALITET
7 Prill14:26
VIDEO/ I jepet sot lamtumira e fundit, mbërrin në banesë trupi i pajetë i 22-vjeçares shqiptare, nëna në gjendje të rënduar: Ilaria ime, ku je o shpirti i mamit!
ITALI- Arkivoli i me trupin e pajetë të Ilaria Sulës e cila u vra me thikë nga ish i dashur i saj, Mark Anthony Samson, ka mbërritur ...
n.f
AKTUALITET
7 Prill14:26
Gjykata e Lartë e ktheu për rigjykim, Apeli i Posaçëm lë në fuqi 2 vite shërbim prove për ish-gjyqtaren Zamira Vyshka
TIRANË- Apeli i GJKKO-së ka lënë në fuqi dënimin për korruspion ndaj ish-gjytarës së Elbasanit, Zamira ...
