Një marinar 24-vjeçar i Marinës Mbretërore Britanike është paraqitur në gjykatë, i akuzuar për përgatitje p&...
AKTUALITET
Leonard Hide i Libohovës paracakton fituesin e tenderit 2.4 mln euro, vendos kritere qesharake dhe kërkon 10 kopshtarë për hidrovorin. A po e monitoron SPAK?
PiranjatPërditësimi i fundit 8 Tetor 2026, 09:22
Kryebashkiaku socialist i Libohovës, Leonard Hide, i cili u pozicionua në korrik të këtij viti kundër reformës territoriale, duket se po nxiton për të finalizuar disa afera të fundit korruptive, plaçkitje dhe qoka para shkrirjes së pritshme të bashkisë që drejton që nga viti 2023, çka do të zeronte mundësinë për të garuar për një mandat tjetër në 2027. I akuzuar nga SPAK-u se ka favorizuar grupet kriminale në kultivimin e kanabisit kur ishte shef krimesh në Policinë e Gjirokastrës, por i shpallur i pafajshëm nga gjykata, Hide po përgatit terrenin për një aferë me një tender 2.4 milionë euro.
Disa sinjalizime dhe evidenca ngrenë dyshime të forta se Leonard Hide ka paracaktuar me pazar në tavolinë fituesin e tenderit për rikonstruksionin e hidrovorit kryesor dhe i kanaleve vaditëse të Bashkisë Libohovë, me fond limit rreth 2.4 milionë euro. Tenderi është shpallur në 2 tetor 2026, por fituesi mësohet se është paracaktuar që në korrik, ku synohet të përvetësohen dhe ndahen të paktën 700 mijë euro. Bëhet fjalë për një biznesmen, lidhje klienteliste e kryebashkiakut Hide, pjesë e disa dosjeve të SPAK për manipulim të procedurave tenderuese, mashtrim, falsifikim dhe korrupsion.
Kompania e piketuar nga Hide për të fituar tenderin është e skeduar për manipulim të procedurave tenderuese, paraqitje të të dhënave të rreme, falsifikim dokumentesh, mashtrim me zbatimin e kontratave publike me zëra fiktivë dhe situacione false, korrupsion dhe pastrim parash. Kompania, për të cilën do të flasim më në detaje në vijim, mësohet se ka bashkëpunuar me kryebashkiakun Hide për ‘qepjen’ e kritereve të tenderit si kostum për veten e saj dhe për të përjashtuar kompani pretendente.
Hide me grupin e tij në bashki ka vendosur disa kritere qesharake dhe pa lidhje me objektin e tenderit, por që i përshtaten kompanisë së paracaktuar dhe nga ana tjerër penalizon konkurrentët. Për shembull, është vendosur si kriter që operatori ekonomik duhet të ketë një inxhinier agronom kur objekti i tenderit nuk ka lidhje me kulturat bujqësore, pasi nuk do kultivohen bimë dhe as nuk do krasiten pemë, por do rikonstruktohet hidrovori dhe kanalet vaditëse. Inxhinieri agronom është vendosur si kriter meqenëse plotësohet nga kompania e paracaktuar fituese dhe nxjerrë jashtë loje shumë kompani të tjera ndërtimi.
Është vendosur si kriter tre inxhinierë hidroteknikë meqenëse kompania e paracaktuar ka shumë të tillë. Do të mjaftonte një inxhinier hidroteknik. Nga ana tjetër, kërkohet koordinator saldimi thua se po ndërtohet Kulla Eiffel në Libohovë, kur konstruksionet metalike janë tejet të kufizuara. Kërkohet që kompania të ketë mbi 200 punonjës dhe madje 60 betonues, kritere të ekzagjeruara që i plotëson vetëm kompania e paracaktuar fituese, madje me ofertë fituese sa fondi limit.
Kriteri më absurd në funksion të skemës së korrupsionit është që kompania duhet të ketë 10 kopshtarë thua se objekti i tenderit nuk do ishte pastrimi i kanaleve dhe hidrovorit, por gjelbërimi i qytetit. Në funksion të manipulimit të procedurës tenderuese, në dokumentet e tenderit janë shkruar marrëzira, të cilat kanë elemente penale. Duket se përqindja nga ky tender ia ka errësuar sytë kryebashkiakut Hide, ndërsa mbetet për t’u parë nëse SPAK dhe BKH po e monitorojnë këtë aferë të dyshuar korruptive./Prapaskena
