Në Shqipëri, në vitin 2024, në institucionet publike të shërbimit spitalor, ishin në dispozicion 8,911 shtretër, sipas...
AKTUALITET
“Listat e deputetëve janë të kriminalizuara”/ Ish-pjesëtari i RENEA në protestë: Zyrtarët shtetërorë tallen me çdo fond publik!
PiranjatPërditësimi i fundit 12 Korrik 2026, 21:22
Pedagogu Gert Metani ka mbajtur një fjalim të fortë përpara protestuesve te Kryeministria, duke ndarë përvojën e tij personale si ish-pjesëtar i forcave RENEA dhe duke denoncuar degradimin e sistemit arsimor, policisë dhe mungesën e hapësirave për fëmijët.
Në nisje të fjalës së tij, ai vlerësoi qëndresën e qytetarëve si rrugën e vetme për ndryshim dhe ngriti alarmin për gjendjen në institucionet arsimore dhe ato të rendit.
“Ju jeni njerëz të lirë të një populli të robëruar! Vetëm nga ju mund të vijë shpëtimi dhe nga kushdo që proteston! Kontributi juaj do e çlirojë Shqipërinë nga kjo kastë e korruptuar! E dini se në Shqipëri policia dekonspiron, universitetet shesin diploma dhe nxjerrin mina me sahat! Nuk bëjnë asnjë studim mbi kuotat që lëshojnë diplomat! Në Shqipëri nuk ka asnjë qytet për studentët, nuk mbështesin kërkimin shkencor dhe ka pedagogë që bëjnë mbi 2 punë sepse nuk kanë dinjitet me pagën që marrin!” u shpreh ai.
Më tej, Metani u ndal te jeta si prind dhe te mungesa e infrastrukturës publike për brezin e ri, duke marrë shembull kryeqytetin.
“Nëse po pyesin kush jam, jam një nga ju, një numër këtu në shesh e do jem deri ditën e fundit! Jam babai i një djali 5 vjeç dhe kam fat ta çoj në teatrin e kukullave që është vetëm një në Shqipëri! Po fëmijët e tjerë si po rriten? Në Shqipëri ka vetëm një pishinë publike! Të gjithë fëmijët që nuk janë aty nuk do shijojnë dot pushimet aty!” denoncoi pedagogu.
Në vijim të fjalës, ai tregoi arsyet se pse u largua nga strukturat elitë të Policisë së Shtetit dhe sesi funksionon aktualisht jeta e tij profesionale.
“Në vitin 2013 nisa akademinë e policisë. 10 mijë persona aplikuan atë kohë. E kuptoni shpresën e madhe që kishin dhe pas fillimit mijëra e braktisën sepse kuptuan qasjen reale të kësaj qeverie. Kam punuar në forcat RENEA dhe kur vjen puna kam ikur me dorëheqje për shkak të mediokritetit dhe drejtuesve analfabetë! Kontribuoj si pedagog në dy universitetet dhe bëj punë të tjera për të siguruar një të ardhme dinjitoze!” deklaroi ai.
Në mbyllje, Metani renditi arsyet kryesore se pse çdo qytetar duhet t’i bashkohet kësaj revolte përpara selisë së qeverisë.
“Kushdo që pyet pse protestohet, protestohet për listat e kriminalizuara me zyrtarë që nuk meritojnë te jenë deputetë e kryetarë, protestohet për kanabizimin e vendit, për talljet e vazhdueshme që çdo zyrtar bën me fondet publike! Unë jam thjesht një numër, jam me ju deri në fund!” përfundoi ai.
