Një aksident i rëndë ka ndodhur sot (4 qershor), në aksin Krutje-“Pushimi i shoferit”, në rrugën Lushnjë-Fier.
...
AKTUALITET
Magazinimi frenon importet e orizit, për muajt janar-mars 2025 bien 24%
n.fPërditësimi i fundit 9 Maj 2025, 11:25
TIRANË- Ndryshe nga makaronat, importet e orizit kanë shënuar rënie gjatë tremujorit të parë të vitit 2025. Sipas të dhënave nga Drejtoria e Përgjithshme e Doganave, në periudhën janar-mars janë importuar rreth 4,200 ton oriz, duke pësuar një rënie prej 24% krahasuar me të njëjtën periudhë të vitit 2024, kur u importuan 5,500 ton. Në vlerë, importet ranë me 28%, nga 510 mijë euro në 368 mijë euro.
Në një analizë më të gjerë, sasia më e lartë e orizit të importuar në tremujorin e parë është regjistruar në vitin 2019, përpara pandemisë së Covid-19. Krahasuar me atë periudhë, importet e këtij viti kanë rënë me 35%.
Megjithatë, sipas grosistëve të tregut, kjo rënie nuk lidhet me rënien e konsumit, por me ndryshimet në politikat e magazinimit të kompanive. Disa prej tyre kishin siguruar sasi të mëdha orizi gjatë muajve tetor-nëntor 2024, me qëllim mbulimin e kërkesës për një periudhë më të gjatë.
Përfaqësues të kompanisë “Teuta”, që operon në fushën e importit dhe paketimit të mallrave ushqimore, thonë se konsumi i orizit është në rritje. Kjo tendencë po mbështetet nga ulja e çmimeve në tregjet ndërkombëtare.
Në vitet e fundit çmimet e shitjes së orizit në tregjet ndërkombëtare kanë pësuar luhatje, të cilat janë reflektuar në shitjet me pakicë në vend. Rritjen më të lartë çmimet e furnizimeve e pësuan në muajin mars 2022, për shkak të krizës ndërkombëtare me çmimet pas agresionit të Rusisë në Ukrainë. Në atë periudhë çmimi i orizit në tregun vendas së pakicës arriti 195-200 lekë për pako.
Rritje të çmimit të orizit në tregjet e huaja pati edhe në 2023, për shkak të ndalimit të eksportit të Indisë nga kushtet e motit që dëmtuan prodhimin. Kjo solli që në treg në atë periudhë të kishte mungesa për një serë varietetesh të produktit. Ndërsa shitjet për orizin e llojit “kokërrgjatë” që tregtohet me çmim të lirë me origjinë nga Pakistani dhe Tailanda sipas importuesve mbetën me shitje të larta.
Ndërkohë, importet e makaronave kanë ndjekur një trajektore të kundërt. Sipas Doganave, për tremujorin e parë 2025, sasia e makaronave të importuara u rrit me 17% krahasuar me të njëjtën periudhë të një viti më parë, ndërsa në vlerë rritja ishte 8%. Viti me nivelin më të lartë të importeve të makaronave mbetet 2022, i ndikuar nga rritja e çmimeve si pasojë e luftës në Ukrainë.
Shtimin sivjet të importit të makaronave përpunuesit e miellit e lidhin me rritjen e konsumit të produkteve të gatshme të brumit, përfshirë makaronat krahasuar me kërkesën për miell./ Monitor
