Një zë i rëndësishëm në Kongresin e Shteteve të Bashkuara të Amerikës, republikania Alexandria Ocasio Cortez ka rea...
AKTUALITET
Mashtronte të rinjtë se do u jepte rrogë 2800 euro/ "Prokurori" i SPAK del para gjykatës, kërkon lirimin nga qelia
PiranjatPërditësimi i fundit 11 Tetor 2025, 13:21
Alban Muço, personi i arrestuar dy ditë më parë nga Policia e Sarandës, ka dalë këtë të shtunë para gjykatës dhe ka kërkuar të mos mbahet më në qeli. Ai pretendonte se ishte prokuror i SPAK dhe kishte mbledhur pas vetes disa të rinj, që i mbante si truproja.
48 vjeçari nga Tirana i kishte mashtruar të rinjtë, duke u thënë se do t'i punësonte si Oficerë të Policisë Gjyqësore dhe do ua bënte pagat nga 2800 euro, ose 2.8 milionë lekë të vjetra.
“Më ishte krijuar bindja se isha prokuror i SPAK-ut. Jam i pafajshëm, nuk kam dëmtuar asnjë qytetar", është shprehur Alban Muço në sallën e gjyqit. Pavarësisht pretendimeve, Gjykata e Sarandë ka vendosur ta lërë atë në qeli.
Avokati i tij, Armand Çaushi kërkoi caktimin e një mase më të lehtë, duke argumentuar se 48 vjeçari nuk ka rrezik për t’u larguar dhe se nuk ka qëllim kriminal.
“Klienti im ka jetuar nën një bindje të deformuar se po bashkëpunonte me drejtësinë. Nuk ka pasur synim të përfitojë financiarisht apo të dëmtojë persona. Kërkoj masë më të butë, arrest në shtëpi", është shprehur avokati, por kjo nuk është marrë parasysh nga togat e zeza.
Hetimet kanë zbuluar se Alban Muço ka mashtruar disa të rinj në Sarandë, duke u premtuar punësim në institucione të drejtësisë. Ai u ishte prezantuar si funksionar i lartë pranë SPAK dhe Prokurorisë së Përgjithshme, duke i “emëruar” si hetues të BKH-së, shoferë dhe truproja personale.
Sipas dëshmive të mbledhura, ai u kishte premtuar një pagë mujore prej 2800 eurosh, plus dieta dhe shpenzime të tjera, të cilat – sipas tij – do të paguheshin nga Prokuroria e Përgjithshme.
