Gjykata e Tiranës ka caktuar masën e sigurisë detyrim paraqitjeje për 18 persona të arrestuar gjatë protestave në Tiran&eum...
AKTUALITET
Unioni i Gazetarëve: Serbia të garantojë lirinë e lëvizjes dhe sigurinë e gazetarëve për ndeshjen shqiptare
PiranjatPërditësimi i fundit 11 Tetor 2025, 12:06
Unioni i Gazetarëve Shqiptarë (UGSH) ka reaguar pas raportimeve se disa gazetarë sportivë shqiptarë janë përballur me kontrolle të tejzgjatura dhe presion psikologjik në pikët kufitare të Serbisë.
Incidentet kanë ndodhur gjatë udhëtimit të gazetarëve për të raportuar ndeshjen e ekipeve kombëtare të futbollit në Leskovac.
"UGSH konsideron sjelljet e autoriteteve serbe si të papranueshme, duke krijuar një klimë stresuese dhe represive për gazetarët shqiptarë. Unioni apelon për solidaritet nga kolegët serbë dhe i kërkon autoriteteve të sigurojnë lirinë e lëvizjes dhe sigurinë e gazetarëve, si për aktivitetet profesionale ashtu edhe për ato turistike. Kontrollet me qëllim presionin psikologjik dhe orët e gjata të mbajtjes në pikat kufitare të gazetarëve sportivë shqiptarë në Serbi janë sjellje shtetërore represive ndaj shtetasve të huaj. Në mediat ndërkombëtare dhe ato shqiptare, dje dhe sot, janë publikuar ankesa nga gazetarë të njohur sportivë të cilët kanë mbërritur në Serbi për të raportuar ndeshjen e ekipeve kombëtare të futbollit, që do të zhvillohet në Leskovac të Serbisë.
Unioni i Gazetarëve Shqiptarë është vënë në dijeni nga pesë kolegë të mediave audiovizive, të cilët janë përballur në aeroportin e Beogradit si dhe në pikën kufitare që bashkon Maqedoninë e Veriut me Serbinë me kontrolle të përsëritura, mbajtje për disa orë të pasaportave, intervistime absurde nga punonjës të kontrollit kufitar dhe jo vetëm, si dhe me pyetje provokative dhe të ripërsëritura si në seanca të një lufte psikologjike, me qëllim tensionimin dhe stresimin e gazetarëve. Sjellje të tilla janë të papranueshme dhe dëshmojnë qartë se në Serbi ndaj gazetarëve shqiptarë ka një klimë shtetërore të papranueshme dhe të pangjashme me realitetin e vendeve të BE apo të hapësirës së Ballkanit Perëndimor.
UGSH apelon pranë organizatave simotra të gazetarëve në Serbi që për raste të tilla ndaj gazetarëve shqiptarë duhet të ofrojnë solidaritetin e reagimit dhe përkrahjes së kolegeve të ardhur nga një vend i rajonit për qëllim të pasqyrimit të aktivitetit të rëndësishëm sportiv. Nga ana tjetër u bëjmë thirrje autoriteteve serbe të ushtrojnë të gjitha detyrimet ligjore për garantimin e sigurisë dhe lirisë së lëvizjes për gazetarët shqiptarë si në rastin e kësaj veprimtarie të rëndësishme sportive ashtu edhe për qëllime turistike dhe profesionale", thuhet në reagim.
