Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
Mediat ndërkombëtare jehonë vendimit të qeverisë për mbylljen e "Tik Tok": Rama bëri fajtor platformën për vdekjen e 14-vjeçarit, opozita njofton protestë
r.llPërditësimi i fundit 6 Mars 2025, 22:54
foto ilustruese
TIRANË- Qeveria ka kërkuar mbylljen e aksesit të aplikacionit TikTok në Shqipëri për 12 muaj. Ministrja e Arsimit, Ogerta Manastirliu pas mbledhjes së qeverisë, ka deklaruar se kanë nisur komunikimin me përfaqësuesit e aplikacionit në mënyrë që gjatë mbylljes së platformës të merren masa për të vendosur filtrat që parandalojnë promovimin e sjelljeve negative.
Lidhur me këtë kanë shkruar edhe mediat ndërkombëtare. CNN shkruan se kabineti qeveritar vendosi mbylljen e platformës së "Tik Tok" duke e bërë fajtore për nxitjen e dhunës dhe bullizmit, veçanërisht midis fëmijëve. Në artikullin e medias amerikane i është bërë jehonë edhe protestës që do të zhvillohet nga opozita lidhur me këtë vendim.
Një tjetër media amerikane, ABCNews shkruan se "qeveria shqiptare e njoftoi këtë masë vitin e kaluar pasi një i mitur goditi me thikë për vdekje një bashkëmoshatar të tij në nëntor pas një grindjeje që filloi në TikTok." Më tej në shkrim thuhet se kur kryeministri Edi Rama tha në dhjetor se synonin mbylljen e platformës së mediave sociale, TikTok kërkoi “qartësi urgjente nga qeveria shqiptare” për rastin e adoleshentit të goditur me thikë.
"France24" i ka kushtuar gjithashtu një artikull këtij vendimi, ku thuhet vendimi për mbylljen e "Tik Tok" u kritikua nga opozita, e cila tha se ndalimi do të kishte një ndikim në përpjekjet e tyre të fushatës përpara zgjedhjeve të ardhshme parlamentare në maj. Duke shpjeguar dhe arsyet se përse qeveria tha se do të ndalojë në vend përdorimin e kësaj platforme thuhet se edhe vendet fqinje si Kosova, Maqedonia e Veriut dhe Serbia gjithashtu kanë raportuar se platforma ka një ndikim negativ, veçanërisht te të rinjtë.
Jehona e këtij vendimi nuk ka munguar edhe në mediat italiane. ANSA shkruan se "qeveria shqiptare e kryeministrit Edi Rama njoftoi sot ndalimin zyrtar të aksesit në platformën kineze të ndarjes së videove TikTok, e cila do të hyjë në fuqi në ditët në vijim. Lëvizja u njoftua tashmë në dhjetor, kur një 14-vjeçar u godit me thikë nga një bashkëmoshatar i tij në Tiranë, vetëm pak hapa larg shkollës së tij, pas një debati në rrjetet sociale. Ndalimi do të jetë aktiv në ditët në vijim."
Ndërkohë në artikullin e Yahoonews.uk thuhet se "kryeministri Edi Rama e shpalli ndalimin e Tik Tok për herë të parë muaj më parë, pas një përplasjeje që nisi në rrjetet sociale që çoi në vrasjen e një nxënësi 14-vjeçar dhe një tjetër të plagosur në një përleshje pranë një shkolle në kryeqytetin e Tiranës. Vrasja ndezi një debat në vend mes prindërve, psikologëve dhe institucioneve arsimore për ndikimin e rrjeteve sociale tek të rinjtë."
