Dashi
Përpiquni të shmangni polemikat dhe diskutimet. Edhe me fjalë nëse është e mundur thoni se jeni të disponueshëm p...
AKTUALITET
Çmimet nuk janë aq të lira sa thuhet zyrtarisht!
PiranjatPërditësimi i fundit 10 Mars 2026, 07:53
Inflacioni bazë e ka nisur në rritje edhe vitin 2026. Sipas informacionit të Bankës së Shqipërisë, inflacioni vjetor bazë për janarin u rrit në 3.09%, nga 3.03% që kishte qenë në dhjetor 2025 dhe 2.36% që kishte qenë në janar 2025. Në këto nivele, inflacioni bazë konfirmohet pranë niveleve më të larta të dy viteve të fundit.
Rritja e inflacionit bazë reflekton një tendencë të rritjes së çmimeve të mallrave të qëndrueshëm dhe sidomos të shërbimeve të prodhuara nga ekonomia e brendshme.
Sipas analizave të Bankës së Shqipërisë, rritja e qirasë përbën burimin kryesor të presioneve të brendshme inflacioniste dhe faktorin më përcaktues që ka sjellë rritjen e inflacionit bazë.
Megjithatë, rritja e disa prej çmimeve të shërbimeve të lidhura me turizmin është balancuar nga rënia e çmimeve të disa mallrave që janë pjesë e shportës së inflacionit bazë.
Nënshporta që mat inflacionin bazë llogaritet mbi një grup produktesh dhe shërbimesh që përbëjnë 69.6% të totalit të shportës së Indeksit të Çmimeve të Konsumit.
Inflacioni bazë përjashton ato produkte që nga natyra kanë luhatshmëri të lartë, si produktet ushqimore dhe energjetike. Llogaritja e inflacionit bazë ka si qëllim kryesor ta zhveshë rritjen e përgjithshme të çmimeve nga lëvizjet me natyrë më afatshkurtër. Inflacioni bazë është një indikator i rëndësishëm për të kuptuar tendencat më afatgjata të çmimeve dhe ndaj monitorohet vazhdimisht nga Banka e Shqipërisë.
Paralelisht me inflacionin bazë, edhe inflacioni bazë neto e nisi vitin 2026 në rritje. Për janarin, ky tregues u rrit në 3.59%, nga 3.47% që ishte në dhjetor 2025 dhe 2.21% që kishte qenë një vit më parë. Inflacioni bazë neto përjashton më tej nga inflacioni edhe nëngrupet e ushqimeve të përpunuara (përfshirë bukën dhe drithërat) dhe matet mbi 44.6% të shoqërisë së IÇK-së.
Ndërkohë, inflacioni që përjashton të gjitha produktet ushqimore dhe energjetike në janar 2026 ishte në nivelin 3.44%, nga 3.32% që ishte në dhjetor dhe 2.09% që kishte qenë një vit më parë.
Inflacioni zyrtar në Shqipëri, i matur për të gjithë shportën e mallrave të konsumit, për janarin ishte në nivelin 2.3%, po aq sa e mbylli edhe vitin 2025. Rritja më e kufizuar e inflacionit i detyrohet kryesisht nivelit të ulët të inflacionit të importuar.
Raporti i fundit i politikës monetare i Bankës së Shqipërisë, i dhjetorit 2025, parashikonte që inflacioni të kthehet në objektivin prej 3%, gjatë tremujorit të dytë të vitit 2026. Ndërkohë, raporti i politikës monetare për tremujorin e parë 2026 nuk është miratuar ende, për shkak të bllokimit të punës së Këshillit Mbikëqyrës, nga përfundimi i mandatit të shumicës së anëtarëve të tij.
Pritet që mbledhja e radhës të zhvillohet në muajin mars, pas zgjedhjes këtë muaj të katër anëtarëve të rinj nga Kuvendi i Shqipërisë.
Raporti i radhës pritet të sjellë parashikime të përditësuara lidhur me inflacionin, por presionet inflacioniste më afatgjata duket se vazhdojnë të jenë të larta./Monitor
