Ish-zëvendëskryeministri Arben Ahmetaj, në një intervistë me “Çim Peka Live”, deklaroi se Rama e ka humbur fuqin&eum...
AKTUALITET
Ndryshimet “epokale” që solli Belinda Balluku
PiranjatPërditësimi i fundit 9 Mars 2026, 21:43
Nga Ola Xama
Sot dëgjuam se si kryeministri analizoi një për një arritjet që ka patur sektori i infrastrukturës dhe energjisë gjatë drejtimit të tyre për 7 vjet nga znj.Balluku. Të gjithë argumentet për të justifikuar votën kundër kërkesës së SPAK për heqjen e imunitetit të saj, Rama i bazoi te ndryshimet “epokale” të sektorëve që ka drejtuar ajo.
Po cilat janë këto “transformime” që renditi kryeministri?
A mund të quhen transformim shembjet e përditshme të rrugëve të reja? A është transformim të të duhen mbi 10 vjet për të ndërtuar një rrugë jo më të gjatë se 50 km dhe sapo e hap për qarkullim të pësojë rrëshqitje, si në rastin e Qukës-Qafë Plloçë? A është transformim të hapësh rrugën e papërfunduar për qarkullim dhe më pas të shembet siç ndodhi me Korçë-Ersekë? A mund të quhet transformim fakti që Unaza e Madhe e Tiranës (projekt 36 vjeçar) nuk ka përfunduar akoma, në pjesët e ndërtuara ka dëmtime dhe nuk ofron zgjidhje për trafikun?
Çfarë quhet transformim, të nisësh zgjerimin e Tiranë-Durrës pa studim dhe me 13 vjet vonesë pasi e ke premtuar? Të marrësh 4 mandate që të nisësh zgjerimin e Elbasan-Qafë Thanë dhe 4 vjet që të nëshkruash kontratat për ndërtimin e rrugëve me koncesion? Është transformim të ndërtosh vetëm 20 km nga 300 të tilla që Korridori Blu përshkon në Shqipëri dhe ato që janë ndërtuar kanë dëmtime (Thumanë-Kashar)?
A është transformim të nisësh të ndërtosh një marinë turisitike në vitin 2022 në Portin e Durrësit dhe sot, në vitin 2026 të mos kesh mbyllur akoma garën për portin e ri zëvendësues? A është transformim të bësh të njëjtën gjë dhe në Vlorë? Të ndërtosh pallate dhe port jahtesh pa nisur zbatimin e projektit të Triportit? Transformim është të rrezikosh të lesh vendin pa port tregtar? Cili është transformimi në energji, reforma e mandatit të parë?
Sa janë rritur kapacitet publike të prodhimit të energjisë? Në vitin 2013 astetet prodhuese të KESH ishin 1572 MWh ndërsa sot janë 1563 MWh, pra vetëm 36 MWh më shumë (sa 7 ditë konsum)! Por arkëtimet janë rritur si për mbledhjen e borxheve të qytetarëve dhe për energjinë që sot nuk tolerohet të mos paguhet. 11 miliard euro tha kryeministri! Atëherë ku shkuan këto para? Përse nuk u investuan dhe përse gjatë krizës kompanitë e sektorit u mbështetën me paratë e buxhetit?
Megjithatë le ta marrim të mirëqënë se ajo çka u tha ishte ashtu dhe se Shqipëria është transformuar, madje ta zemë se në këtë kohë janë ndërtuar tunele nënujorë e linja transmetimi energjie me kontinente të tjera. Këtu kryeministri do të duhet të jepte një qëndrim elementar:
A është në parimin e tij dhe të Partisë Socialiste që në emër të ndërtimit të “veprave të mëdha infrastrukturore” të fluturojnë 30 milion euro vetëm për një të tillë? A mund të duartrokitet dhe mbrohet një anëtare e kabinetit të tij kur ka dirigjuar caktimin e kompanisë që do të fitojë këtë shumë pa bërë asnjë punë (pa e paragjykuar nëse ka përfituar vetë apo jo)?
Për ta besuar këtë, z. Rama nuk ka nevojë të lexojë 16 mijë faqe me dokumenta që ka dorëzuar SPAK në Kuvend, por mjafton të telefonojë drejtorin e Tatimeve dhe ta pyesë se sa është dividenti që kanë ndarë kompanitë turke nga projekti i Tunelit të Llogarasë.
Aty mbase e kupton se i vetmi ndryshim epokal sot, ishte komunikimi i aktit insitucional që do të ndodhë ditën e enjte, ku socialistët për herë të parë distancohen publikisht nga një drejtësi re, e promovuar nga vetë ata si shpëtim i vendit - dhe që u ka kushtuar dhjetra vite pritje qytetarëve të thjeshtë me justifikimin se do t’i jepte fund pandëshkueshmërisë.
