Dosja hetimore ndaj ish zëvendëskryeministres Belinda Balluku duket se po thellohet, ndërsa paralajmërohen zhvillime të forta nga Pro...
AKTUALITET
Ministria publikon sukseset e IVF, pacientja denoncon trajtimin skandaloz në maternitetin “Koço Gliozheni”
PiranjatPërditësimi i fundit 14 Mars 2026, 16:29
Vetëm dy orë më parë, Ministria e Shëndetësisë dhe Mbrojtjes Sociale publikoi në rrjetet sociale një postim ku njoftonte se në Maternitetin Koço Gliozheni kanë ardhur në jetë dy bebe binjake falë trajtimit IVF.
Sipas njoftimit, deri më sot 21 foshnja kanë lindur përmes këtij programi të fertilizimit in vitro, duke e paraqitur iniciativën si një histori suksesi për çiftet që përballen me infertilitetin.
Por në të njëjtën kohë, në redaksinë tonë ka mbërritur një denoncim nga një vajzë e cila pretendon se përvoja e saj në të njëjtin maternitet ka qenë krejt e ndryshme.
Ajo tregon se prej dy vitesh ndjek trajtimin IVF në këtë institucion dhe se vetëm për analiza dhe procedura të ndryshme ka shpenzuar rreth mbi 1 milion lekë. Sipas saj, tentativa e parë e fertilizimit nuk ka rezultuar e suksesshme, një situatë që ajo e konsideron të kuptueshme pasi jo çdo procedurë garanton rezultat.
Megjithatë, shqetësimi i saj kryesor lidhet me mënyrën se si është trajtuar nga stafi. Vajza pretendon se nuk ka pasur komunikim të qartë me mjekët dhe se nuk i janë dhënë shpjegime të detajuara për ecurinë e procesit. Ajo shprehet se informacionin përfundimtar e ka marrë përmes një mesazhi telefonik, ku i është thënë se embrioni nuk është zhvilluar, pa asnjë sqarim të mëtejshëm.
Sipas denoncimit, pacientja pretendon gjithashtu se ka kërkuar të marrë dosjen e saj mjekësore, por nuk i është vënë në dispozicion dhe se kur është paraqitur në maternitet nuk është lejuar të futet brenda.
“Këtu është si stallë lopësh, nuk ka respekt dhe komunikim me pacientët”, shprehet ajo në mesazhin e dërguar në redaksinë tonë, duke shtuar se mënyra e komunikimit nga ana e stafit ka qenë, sipas saj, “brutale”.
Ky denoncim ngre pikëpyetje mbi mënyrën se si menaxhohen rastet e pacienteve që ndjekin trajtimin IVF në këtë institucion, veçanërisht në lidhje me komunikimin me pacientët dhe transparencën për procedurat dhe rezultatet./Piranjat News
