Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
Ndarja nga jeta e Kryepeshkopit Anastas Janullatos/ "Shkak funksionimi i pamjaftueshëm i shumë organeve", Kisha Ortodokse: I përjetshëm qoftë kujtimi i tij!
n.fPërditësimi i fundit 25 Janar 2025, 09:07
Kryepeshkopi
TIRANË- Kisha Ortodokse Autoqefale e Shqipërisë ka reaguar përmes një postimi në "Facebook" në lidhje me ndarjen nga jeta të Kryepeshkopit, Anastas Janullatos. Në postim Kisha Orthodhokse Autoqefale e Shqipërisë shkruan se Kryepeshkopi ndërroi jetë sot më 25 Janar 2025, në orën 08:30 të mëngjesit në Spitalin "Evangelismos" të Athinës.
Më tej në postim theksohet se Janullatos ka ndërruar jetë si pasojë e funksionimit të pamjaftueshëm të shumë organeve. Kisha Ortodokse më tej shkruan se kryepeshkopi me vizionin hyjnor dhe punën e tij të palodhur rindërtoi nga themelet jetën kishtare, ndërtoi qindra kisha, krijoi institucione arsimore dhe bamirëse, si dhe formoi një brez të ri klerikësh, duke ofruar një shërbesë të pandërprerë e sakrifikuese për më shumë se 33 vjet.
Fjeti më Zotin Kryepiskopi i Tiranës, Durrësit dhe Gjithë Shqipërisë, ANASTASI. Kisha Orthodhokse Autoqefale e Shqipërisë, me dhimbje të thellë, njofton fjetjen më Zotin të Kryepiskopit të Tiranës, Durrësit dhe të gjithë Shqipërisë, Fortlumturisë së Tij, Anastasit. Kryepiskopi ndërroi jetë sot, 25 Janar 2025, në orën 08:30 të mëngjesit, në moshën 95-vjeçare, në Spitalin "Evangelismos" të Athinës, si pasojë e funksionimit të pamjaftueshëm të shumë organeve. Më parë, ishte kuruar për disa ditë në Spitalin "Hygeia" të Tiranës.
Ftojmë besimtarët orthodhoksë të Kishës së Shqipërisë të luten për prehjen e shpirtit të Kryebariut të ndjerë. Fortlumturia e Tij, Kryepiskopi Anastas, ishte rindërtuesi dhe rigjallëruesi i Kishës Orthodhokse Autoqefale të Shqipërisë, të cilën e ngriti tërësisht nga rrënojat pas rënies së regjimit ateist. Me vizionin hyjnor dhe punën e tij të palodhur, ai rindërtoi nga themelet jetën kishtare, ndërtoi qindra kisha, krijoi institucione arsimore dhe bamirëse, si dhe formoi një brez të ri klerikësh, duke ofruar një shërbesë të pandërprerë e sakrifikuese për më shumë se 33 vjet. I përjetshëm qoftë Kujtimi i tij!
Kryepeshkopi Anastas Janullatos ndodhej prej 30 dhjetorit të 2024-ës i shtruar në spital, fillimisht në Tiranë për shkak të një viroze stine. Më pas gjendja e tij u përkeqësua për shkak edhe të një gjakderdhjeje në sistemin e aparatit tretës, për të cilën u dërgua në Athinë më 3 janar. Pas disa ditësh i shtruar në spital ai iu nënshtruar edhe një operacioni ku ka qëndruar në terapi intensive.
