Kryetari i PD-së, Sali Berisha i bëri thirrje maxhorancës të anulojë një anti-miting të paralajmëruar për ta mbaj...
AKTUALITET
"Në pikëpyetje mbrojtja e azilkërkuesve"/ Si u pasqyrua në mediat ndërkombëtare nisja e anijes me emigrantë nga Italia drejt Shqipërisë?
r.llPërditësimi i fundit 14 Tetor 2024, 21:45
foto ilustruese
TIRANË- Anija "Libra e Marinës" është nisur sot drejt Shqipërisë për të sjellë grupin e parë të emigrantëve në qendrat e ngritura në Lezhë, ku refugjatët do t'iu nënshtrohen procedurave të përshpejtuara kufitare. Emigrantët e parë që do mbërrijnë në Shqipëri janë vetëm 16 meshkuj, ku asnjë prej tyre nuk ka prekur ujërat italiane. Sapo anija të mbërrijë në portin e Shëngjinit, ata do të transferohen në Gjader, ku janë tre struktura të dorëzuara vetëm më 9 tetor te Ministria e Brendshme italiane për testim: një qendër për ndalimin e azilit të aplikantëve me 880 vende (nga të cilat vetëm 400 janë gati deri më sot, më pak se gjysma), një CPR me 144 vende dhe një burg i vogël me 20 vende.
Mediat prestigjioze ndërkombëtare po ashtu kanë kthyer sot sytë nga nisja e anijes nga brigjet e Italisë për të mbërritur në Shqipëri.
France24 me titullin "Italia nis transferimet historike të emigrantëve në Shqipëri", shkruan se Italia ka filluar sot transferimin e emigrantëve të kapur në Mesdhe në qendrat në Shqipëri, në zbatim të marrëveshjes së parë evropiane që ka ngjallur kritika nga grupet e të drejtave të njeriut.
"Qendrat do të funksionojnë sipas ligjit italian, me sigurimin dhe stafin italian, dhe gjyqtarët që do të dëgjojnë çështjet nëpërmjet lidhjes video nga Roma. Emigrantët që konsiderohen të pambrojtur sipas ligjit të BE-së - duke përfshirë të miturit, gratë, njerëzit me probleme të shëndetit mendor ose viktimat e torturës, abuzimit ose trafikimit të qenieve njerëzore - do të përjashtohen. Por grupet e të drejtave të njeriut vënë në dyshim nëse Shqipëria do të ofrojë mbrojtje të mjaftueshme për azilkërkuesit. Amnesty International e ka përshkruar skemën si një "eksperiment mizor (që) është një njollë për qeverinë italiane".", shkruhet ndër të tjera në artikull.
Prestigjiozja amerikane "The New York Times", shkruan se Italia ka nisur dërgimin me anije në Shqipëri të emigrantëve që u nisën për në brigjet italiane. Edhe kjo media thekson në artikull se kjo marrëveshje e cila u shpall nga disa liderë të BE si model inovativ në menaxhimin e emigracionit të paligjshëm në vendin fqinjë, ka marrë kritika nga zyrtarë dhe grupe të të drejtave të njeriut.
"Plani, i cili po shpallet nga qeveria italiane dhe disa liderë të Bashkimit Evropian si një model inovativ për të menaxhuar dhe penguar imigracionin në Itali, është kritikuar nga zyrtarë dhe grupe të të drejtave të njeriut, të cilët kanë frikë se do t'i rrezikonte emigrantët dhe do t'i ekspozonte ata ndaj shkeljeve të të drejtave.
Kritikët kanë thënë se plani do të ishte një "eksternalizim" i rrezikshëm i kufijve kombëtarë. Kur u njoftua plani, komisionerja e Këshillit të Evropës për të drejtat e njeriut, Dunja Mijatovic, paralajmëroi se "masa të tilla rrisin ndjeshëm rrezikun e ekspozimit të refugjatëve, azilkërkuesve dhe migrantëve ndaj shkeljeve të të drejtave të njeriut". Presidentja e Komisionit Evropian, Ursula von der Leyen, e ka miratuar planin, duke e quajtur atë "një shembull të të menduarit jashtë kutisë, bazuar në ndarjen e drejtë të përgjegjësive me vendet e treta".", thuhet ndër të tjera në artikull.
"The Guardian" po ashtu i ka kushtuar një shkrim zbatimit të marrëveshjes Shqipëri-Itali për emigrantët, me titull "Italia dërgon azilkërkuesit e parë në Shqipëri sipas paktit të diskutueshëm"
"Ministria e Brendshme tha se 16 burra ishin në bord - 10 Bangladesh dhe gjashtë Egjiptianë. Ata mbërritën nga Libia dhe u shpëtuan të dielën në ujërat ndërkombëtare nga roja bregdetare italiane. Anija pritet të mbërrijë në Shqipëri mëngjesin e së mërkurës.", thuhet ndër të tjera në shkrim.
"Reuters" shkruan se anija me emigrantë nga Italia pritet të mbërrijë të mërkurën në Shqipëri. Dhjetë emigrantë ishin nga Bangladeshi dhe gjashtë nga Egjipti, vende të cilat konsiderohen të sigurta nga Italia.
"Sipas kushteve të marrëveshjes me Shqipërinë, deri në 36,000 emigrantë mund të dërgohen në vendin ballkanik çdo vit, për sa kohë që vijnë nga lista e vendeve të sigurta, gjë që kufizon ashpër mundësinë e marrjes së azilit. Megjithatë, një vendim nga Gjykata Evropiane e Drejtësisë (ECJ) i lëshuar në fillim të këtij muaji mund të sjellë probleme në punë, thonë ekspertët, pasi ai kufizon përkufizimin e asaj që mund të konsiderohet një vend i sigurt jashtë BE-së.", shkruhet në artikull.
"Italia nis transferimet e diskutueshme të emigrantëve në Shqipëri mes protestave për të drejtat e njeriut", është titulli i zgjedhur nga "Turkiye Today".
"Hapja e qendrave të Italisë në Shqipëri përkon me samitin e ardhshëm të BE-së në Bruksel, ku pritet të diskutohen politikat e migracionit, përfshirë dëbimet më të shpejta të atyre që nuk kanë të drejtë për azil. Grupet e të drejtave të njeriut kanë ngritur shqetësime rreth marrëveshjes, duke vënë në pikëpyetje nëse Shqipëria do të sigurojë mbrojtje të mjaftueshme për azilkërkuesit. Ministri i Brendshëm italian Matteo Piantedosi i cilësoi qendrat shqiptare si objekte të paraburgimit të lehta, duke thënë: “Nuk ka tela me gjemba dhe ofrohet ndihma”. Ai shtoi se të gjithë emigrantët mund të aplikojnë për mbrojtje ndërkombëtare dhe të presin një përgjigje brenda pak ditësh.", shkruan media turke.
