Senatorja amerikane Elissa Slotkin (Demokrate nga Miçigani) ka reaguar në rrjetin social X lidhur me dhunën policore në protestën stu...
AKTUALITET
Në prag të sezonit turistik, rriten importet që furnizojnë hotelet, 27% më shumë krahasuar me një vit më parë
b.zPërditësimi i fundit 31 Mars 2025, 10:22
Foto ilustruese
TIRANË - Sektori i turizmit ka marrë timonin e ekonomisë vitet e fundit, duke rritur prurjet valutore, punësimin dhe pagat, por përfitimet nuk po shtrihen për të nxitur sektorë të tjerë të ekonomisë, sidomos prodhimin.
Të dhënat mbi tregtinë e jashtme në dy mujorin e parë të vitit tregojnë se sasitë e importeve që lidhen me industrinë akomodimit dhe restoranteve po rriten.
Hotelet janë duke bërë përgatitjet për hapjen e sezonit që tashmë është afruar më herët në pranverë. Gjatë janar- shkurt sasitë e importeve e mobilieve, krevateve, dyshekëve dhe pajisjeve të ndriçimit janë rritur me 27 për qind në krahasim me të njëjtën periudhë të vitit të kaluar.
Importet e pëlhurave dhe të tapicerive gjithashtu pësuan rritje me 33 për qind, prej kërkesës që kanë hotelet ne nisje të sezonit për çarçafë dhe perde etj. Këtë fillim vit kanë rënë importet e çadrave të diellit dhe prodhimeve të kashtës, të cilat kanë qenë shumë të larta vitin e kaluar.
Importet e çadrave janë frenuar këtë vit për shkak të disa rregullave të reja që përcaktoi qeveria në nëntor të vitit të kaluar që kufizon hapësirën në bregdetit nga plazhet private.
Turizmi po nxit gjithashtu edhe transportin detar për qëllime argëtimi. Të dhënat e dhënat zyrtare të INSTAT tregojnë se në janar-shkurt sasia e importeve të varkave dhe mjeteve të lundrimit pësoi rritje vjetore me 39%. Importi i varkave është rritur ndjeshëm vitet e fundit edhe për shkak të rritjes së aktivitetit te peshkimit.
Flota ka rritur numrin e anijeve nisur nga kërkesa e restoranteve dhe çmimet e larta të peshkut të egër dhe prodhimeve të tjera të detit.
Sasia e ushqimeve të importuara u rrit me tej në dy mujor me 4.6%, teksa sasitë e peshkut thuajse janë dyfishuar. Në janar-shkurt u importuan mbi 3 mijë tonë peshk nga 1,7 mijë tonë në dy mujorin 2023 me rritje 68%.
Shqipëria e ka të zhvilluar sektorin e mobilieve në tregun vendas në formë punishtesh dhe këto e kanë të pamundur të përballojnë kërkesën voluminoze që kanë hotelet. Të dhënat të tjera zyrtare nga INSTAT tregojnë se bizneset në sektorin e mobileve u përballen me faliment vitet e fundit, në paradoks me vrullin e ndërtimeve në Tiranë dhe në bregdet.
Është fakt se tre vitet e fundit sektori i turizmit u rrit shpejt, por prurjet valutore po ikin sërish jashtë vendit për të siguruar mallrat dhe ushqimet që nevojiten për pritjen e tyre. Psh sektori bujqësor po kalon vështirësi si në blegtori dhe prodhim, duke reflektuar mungesën e financimeve, të fuqisë punëtore dhe kostove të larta të in-puteve. Nga ana tjetër rënia e euros po i bën mallrat e importit më të lira, duke i bërë ato gjithnjë e më konkurruese me ato që prodhohen në vend.
Në tremujorin e tretë të vitit të kaluar të gjithë sektorët që kishin lidhje me prodhimin pësuan rënie të shitjeve, përveç ndërtimit./ Monitor
