Reperi i njohur kosovar, Capital T, u ka bërë thirrje mediave në Kosovë që tu kushtojnë më shumë vëmendje zhvillime...
AKTUALITET
“Në Shqipëri toka nuk është më nënë”/ Vrasjet më të bujshme për shkak të pronave
Dea DervishiPërditësimi i fundit 7 Tetor 2025, 13:43
Nga Dea Dervishi
Në Shqipëri toka nuk është më nënë (Mëmëdhe) por është kthyer në shkak vrasjeje
Mjafton një copë edhe diku andej me ndonjë cep ku dikur mbillej grurë sot rrjedh gjak. Jemi vendin qe ligji ka më shumë nene se zgjidhje dhe gjykatat janë kthyer në fushë betejë dhe gjyqtarët në viktima potenciale.
Një konflikt për pronat solli një bilanc tragjik me një të vdekur dhe dy persona të tjerë të plagosur. Gjyqtari Astirt Kalaja u ekzekutua me armë menjëherë pasi dha vendimin.
Ngjarja lidhej me çështjen e pronësisë që dy palët e përfshira në proces kishin. Pasi nuk i pëlqeu vendimi i gjykatës, autori e ktheu sallën e gjyqit në arenë gjaku dhe krimi.
Autori Elvis Shkambi armën ia kishte marrë rojës së sigurisë së gjykatës. Pas kësaj, ai doli te dera e gjykatës dhe i tha patrullës së policisë: “Unë jam autori.”
Por ky nuk është rasti i vetëm kur problemet me pronësinë sjellin viktima dhe gjak.
Më datë 7 maj 2025, një krim i paralajmëruar dhe i mbartur prej vitesh çoi në një tjetër vrasje në Has. Viktima është Reshit Sallahu, ndërsa autori i arrestuar është Ylber Jaku, 41 vjeç. Dyshohet se autori e ka pritur viktimën disa metra larg shtëpisë, e ka qëlluar sapo zbriti nga mjeti dhe i ka marrë jetën.
Ngjarja ka lidhje me një konflikt të raportuar një ditë më parë, ku dy bashkëshortë përfunduan në spital pas një përleshjeje për shkak të pronave.
Sipas dinamikës, rezulton se Sallahu, pas konfliktit për pronësi, sulmoi çiftin e bashkëshortëve që po mjekohen në spital, dhe për motive hakmarrjeje dyshohet se i afërmi i të dëmtuarve sulmoi fatalisht me armë zjarri familjarin e autores së plagosjes së dyfishtë.
Më 18 gusht 2018, një 24-vjeçar ekzekutoi me armë tetë persona.
Masakra ndodhi si pasojë e një konflikti për pronat.Ridvan Zykaj ekzekutoi në gjakftohtësi vëllain e gjyshit të tij, Demir Zykën, bashkëshorten e tij, dy djemtë e çiftit Zyka (kushërinjtë e parë të babait të autorit), si edhe nipin dhe mbesën 14 dhe 6 vjeçe (kushërinj të dytë me autorin).
Skerdilajd Konomi u vra më 9 shtator 2011.
Më 9 shtator 2011 u vra me eksploziv gjyqtari i Gjykatës së Vlorës Skerdilajd Konomi, atentat me tipare mafioze që la pas vetëm dyshime dhe asnjë të ndaluar. Pista kryesore ishte ajo e çështjeve të ndjeshme të pronësisë që kishte gjykuar.
Tetë vite më vonë, më 22 mars 2019, avokati Ravik Gurra u ekzekutua me armë zjarri në një lokal në Elbasan, në kulmin e tensioneve mes grupeve kriminale, duke treguar se edhe avokatët nuk ishin më të paprekshëm përballë dhunës.
Në republikën tonë të parcelave nuk matet pasuria me hektar por me funerale. Kur shteti mbyll sytë- toka si gjithmonë i hap plagët vet.
Në këto kushte, situata në vend është jashtëzakonisht e rëndë — jeta kushton pak, sa një grusht dhe. Por patjetër që përtej atyre që shtypin këmbëzën apo vendosin dinamitin, ka fajtorë më të mëdhenj: shteti dhe pushteti.
Në raportin e Komisionit Evropian për Sundimin e Ligjit “Rule of Law Report – Country Chapter: Albania” për vitin 2025, përmendet se vendi ynë ka një sërë sfidash:
Probleme në ekzekutimin e vendimeve gjyqësore për pronat që janë objekt padish apo çështjesh të mëparshme;
Mungesë koordinimi ndërinstitucional dhe ngadalësi administrative që pengojnë realizimin e të drejtave pronësore. Por ne nuk jemi të vetmit në botë që kemi pasur probleme të tilla; mjafton të implementojmë zgjidhjet që të tjerët kanë zbatuar.
Pas konflikteve apo regjistrimeve, disa vende kanë krijuar komisione speciale që merren vetëm me rastet dhe konfliktet e pronave. Ky lloj modeli është përdorur në Irak dhe në Estoni./Piranjat.al
