Qytetarë, ambientalistë dhe aktivistë të shoqërisë civile janë mbledhur këtë mbrëmje në Tiranë p&e...
AKTUALITET
Nga 100 autobusë te 7 linja turistike: Programi i qeverisë që harron qytetarët
PiranjatPërditësimi i fundit 18 Shtator 2025, 14:53
Qeveria ka përfshirë në programin e saj për “Infrastrukturën Moderne” një projekt ambicioz që titullohet “Rrjet kombëtar transporti publik dhe i gjelbër”. Në letër, kjo iniciativë synon ngritjen e një shoqërie shtetërore, MobAl, vënien në funksion të rreth 100 autobusëve elektrikë dhe ofrimin e transportit shkollor në disa zona të vendit. Por, pas leximit me kujdes, programi ngre më shumë dyshime sesa garanci.
Shoqëria shtetërore MobAl – shërbim publik apo monopol?
Krijimi i një kompanie shtetërore për transport publik ngre pikëpyetje të forta: A do të hyjë kjo shoqëri në konkurrencë me operatorët privatë, apo do të marrë monopolin e shërbimit? Si do të financohet – nga buxheti i shtetit apo përmes kredive dhe PPP-ve? Deri më sot, nuk ka transparencë mbi modelin ekonomik që do të ndjekë MobAl.
Prioritet turizmi, jo qytetarët
Në fazën e parë, MobAl parashikon të ofrojë shërbim në 7 itinerare turistike kombëtare. Kjo lë të kuptohet se prioritet nuk janë qytetarët që përdorin transport publik çdo ditë, por imazhi turistik i vendit. Ndërkohë, transporti urban e ndërqytetas mbeten jashtë vëmendjes së programit.
Transporti shkollor – vetëm për tre zona
Një tjetër element është ofrimi i transportit shkollor në vetëm tre zona strategjike: veri, jug dhe juglindje. Po nxënësit në pjesën tjetër të vendit, që gjithashtu përballen me mungesë aksesesh? Ky kufizim e bën nismën të pjesshme dhe jo gjithëpërfshirëse.
Në fund, projekti për “Rrjetin kombëtar të transportit publik dhe të gjelbër” është një ide që në teori tingëllon moderne dhe e nevojshme. Por në mungesë të transparencës, detajeve konkrete dhe një plani financiar të qartë, mbetet të shihet nëse do të kthehet në realitet, apo do të mbetet një tjetër premtim i papërmbushur.
Premtimi:Rrjet kombëtar transporti publik dhe i gjelbër” është një nga pikat e programit qeverisës për Infrastrukutrën Moderne, pjesë e shtyllës së dytë “Rritja ekonomike e qëndrueshme”. Ndër të tjera, kjo pikë e programit parashikon vënien në funksion të një flote prej rreth 100 autobusë elektrikë, si dhe ngritjen e shoqërisë shtetërore MobAl.
Programi qeverisës për pikën “Rrjet kombëtar transporti publik dhe i gjelbër”
Ngremë shoqërinë shtetërore MobAl si Agjenci Kombëtare për Transportin Publik, që në fazën fillestare ofron shërbime në 7 itinerare turistike kombëtare dhe ofron transport publik shkollor në tre zona të vendosura strategjikisht në veri, jug dhe juglindje, aty ku nxënësit kanë vështirësi në aksesimin e shkollës, duke garantuar mundësi të barabarta arsimimi për çdo fëmijë.
Vëmë në funksion një flotë prej rreth 100 autobusësh elektrikë, me standarde të reja sigurie, efikasiteti dhe respekti për mjedisin.
Komplementojmë sistemet elektronike të biletave dhe GPS/AVL, duke garantuar menaxhim transparent, monitorim në kohë reale dhe shërbim të besueshëm për qytetarët.
Garantojmë përfitime sociale afatgjata: uljen e braktisjes shkollore, reduktimin e pabarazive territoriale dhe mbështetjen e fuqisë punëtore në turizëm, duke i dhënë vendit një transport publik që shërben për qytetarët dhe zhvillimin ekonomik./Piranjat.al
