“Nuk e di si u plagosa!" Vrasja e dyfishtë në Velipojë, gjykata lë në burg dy të arrestuarit, kamarieri: Kur pashë këmbën me gjak dhe plagën e shkaktuar nga plumbi...

VELIPOJA- Gjykata e shkallës së parë në Shkodër ka lënë me masën e sigurisë “arrest me burg” për Zyber Zagradin, kamarieri i plagosur dhe Mario Palin, të dyshuar si bashkëpunëtor të autoreve të dyshuar të vrasjes së dyfishtë të ndodhur pak ditë më parë në Velipojë. Bëhet me dije se Zagradi dhe Pali deklaruan në sallën e gjyqit se ata kanë ardhur në momentin pasi kishte nisur konflikti mes vëllezërve Frroku dhe dy viktimave Ersild Ishmi dhe Arsid Hoxha.

Të arrestuarit deklaruan se kanë parë Edmir Frrokun duke qëlluar ndërsa u shprehën se nuk e kanë patur idenë se si ka nisur konflikti mes tyre sepse mbërritën më vonë.  Kamarieri deklaroi gjithashtu se nuk e ka idenë se si ka mbetur i plagosur.

“Nuk e di si u plagosa, vetëm kur pashë këmbën me gjak dhe plagën e shkaktuar nga plumbi që kisha marrë”, mësohet të ketë thënë ai.

Si ndodhi vrasja e dyfishtë?

Arsid Hoxha dhe Ersild Ishmi u qëlluan nga dy vëllezërit Eduard dhe Gëzim Frroku, pronarë të një hoteli. Si pasojë e të shtënave ka mbetur i plagosur edhe Zyber Zagradi, i cili ndodhet jashtë rrezikut për jetën. Dyshohet se ngjarja është e lidhur me një konflikt të mëparshëm që ka ndodhur më 28 qershor. Në atë datë, një debat kishte shpërthyer mes kamarierit dhe kuzhinierit të një lokali dhe pronarëve të hotelit, Eduart dhe Gëzim Frroku.

Dyshohet po ashtu se Ersild Ishmi kishte ardhur për të diskutuar me pronarët për shkak të lidhjeve miqësore që kishte me kamarierin dhe kuzhinierin. Për këtë ngjarje, si rezultat, Ishmi ishte arrestuar dhe më vonë ishte liruar me masën arrest shtëpie nga gjykata, masë e cila ishte në fuqi deri natën e djeshme. Kështu, mbrëmjen e shkuar Ishmi dhe Hoxha u qëlluan me armë zjarri nga dy vëllezërit Frroku, ndërsa vdekja e tyre u konfirmua në Spitalin Rajonal të Shkodër.

velipoja