Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
Përplasja me armë në Bushat/ GJKKO lë në fuqi masën "arrest me burg" për Sakicën e Troshanin
M.B.Përditësimi i fundit 20 Shkurt 2025, 13:24
TIRANA- Gjykata e Posaçme ka vendosur të lërë në fuqi masën e sigurisë “arrest në burg” për Samuel Troshanin dhe Izmis Sakicën, të arrestuar për përplasjen me armë zjarri në gusht 2024 në Rranxë të Bushatit.
Bëhet me dije se të akuzuarit nuk u paraqitën në seancë, duke u përfaqësuar me prokurë nga avokati Sokol Tahiraj. Kjo bëri që të dështojë marrja e tyre në pyetje teksa seanca u kufizua vetëm në rivlerësimin e masave të sigurisë, raporton gazetarja Keti Banushi. Për këtë ngjarje mbetet ende në kërkim Aleksandër Prendi, i cili dyshohet si një nga protagonistët kryesorë të përplasjes me armë mes dy grupeve.
Sipas hetimeve të Prokurorisë së Posaçme Sakica dhe Troshani në bashkëpunim edhe me një person me iniciale F.l., akuzohen si të implikuar në atentatin e dështuar, ndërsa akuzohen gjithashtu edhe për grup të strukturuar kriminal, armbëmbajtje pa leje dhe vrasje e mbetur në tentativë.
Nga hetimet e prokurorisë, ka rezultuar se personat e lartpërmendur kanë qenë të armatosur dhe ka dyshime të arsyeshme të bazuara në prova, se ata kanë shkuar në Rranxë të Bushatit me qëllim vrasjen e personit nën hetim Aleksandër Prendi dhe familjarëve të tij, banorë të kësaj zone.
SPAK sqaron se në kohën që ata kanë qenë duke kaluar në këtë zonë, janë qëlluar me armë zjarri nga Prendi. Nga provat e siguruara në vendin e ngjarjes rezulton të ketë pasur shkëmbim zjarri, jo dëmtime të shëndetit të personave të përfshirë, por vetëm të mjeteve.
