Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një r...
AKTUALITET
“Po grabisin pronat” banorët e fshatit Rrjoll protestë para SPAK: Të ndalen punimet e resortit!
Nga Xhuljan FerzajPërditësimi i fundit 5 Shkurt 2026, 11:20
Paraditen e sotme, banorët e fshatit Rrjoll të Velipojës, në qarkun e Shkodrës e zhvendosën protestën e tyre para SPAK.
Me pankarta në duar dhe thirrjet për drejtësi kërkuan nga Prokuroria e Posaçme të nisë hetimet për resortin që do të ndërtohet në fshatin e tyre, ku pretendojnë se po u zaptohen pronat.
“Resorti turistik do të ndërtohet në pronat tona, kjo gjë na dëmton prandaj kemi besim tek SPAK se do të zgjidhi problemin tonë”, u shpreh një nga banorët.
“Fajin për hedhjen e firmës për lejen e ndërtimit e ka Belinda Balluku”, shtoi një tjetër protestues.
Kujtojmë se zv/kryeministrja Belinda Balluku, ndodhet nën akuzë, e pandehur dhe me masë sigurie nga SPAK dhe GJKKO, për të cilën kërkohet edhe heqja e imunitetit nga parlamenti, për abuzime me detyrën në tenderimet e Tunelit të LLogarasë dhe Unazës së Madhe, pas përgjimeve të siguruara në telefonin e Ervis Berberit, ish-kreut të ARRSH-së.
Banorët po vijojnë protestën para SPAK, ku po kundërshtojnë projektin dhe kërkojnë pronat e tyre.
“Kërkojmë të ndalen punimet, kjo është padrejtësi që po na bëhet ne 60 familjeve të fshatit Rrjoll, kërkojmë të vihen para drejtësisë personat përgjegjës për falsifikime dhe zaptim të pronës private”, deklaroi i revoltuar një banor i zonës.
Ata u shprehën se do të vijojnë protestat deri në ndalimin e projektit të cilin e quajtën “grabitje të pronës private”, gjithashtu kërkuan që të lirohen personat e shoqëruar nga policia gjatë protestës së djeshme./Piranjat News
