Një ngjarje e rëndë është regjistruar në afërsi të ishujve të Ksamilit, ku është gjetur i pajetë n...
AKTUALITET
Prishjet e ndërtimeve në Theth, famulltari Kastriot Demaj letër qeverisë: Jo një tjetër korrik i turpit, ndaloni!
PiranjatPërditësimi i fundit 4 Tetor 2025, 15:00
At Kastriot Demaj, famullitari i Thethit dhe Breglumit, me anë të një letre, i ka bërë thirrje qeverisë ndaj shkatërrimit të shtëpive dhe kasolleve prej druri në zonën turistike të Thethit. Ai e konsideron këtë veprim si një gabim të rëndë që nuk duhet të përsëritet, duke theksuar se është detyrë morale e tij të reagojë në mbrojtje të dinjitetit dhe të drejtave të banorëve të kësaj zone.
Në një deklaratë drejtuar autoriteteve shtetërore, At Demaj thekson se shkatërrimi i objekteve që janë pjesë e jetës tradicionale dhe jetike të banorëve të Thethit ka shkaktuar dëme të mëdha. Ai kujton shembujt e famullitarëve të dikurshëm të Shalës, të cilët kanë shërbyer për shekuj me radhë "në luftë e në paqe, në gëzime e në hidhërime", dhe e sheh si të drejtë themelore që banorët të kenë dokumentacion të pronësisë mbi tokat dhe shtëpitë e tyre.
Famullitari e lidh këtë problem me mungesën e infrastrukturës dhe me faktin që zona e Shalës dhe Dukagjini po braktisen nga banorët për shkak të kushteve të vështira të jetesës, mungesës së rrugëve dhe mbështetjes shtetërore. Ai kërkon që Qeveria të mos e përsërisë gabimin e korrikut, kur fadromat shkatërruan objekte të ndërtuara me mund dhe me pasion nga banorët e zonës, që ishin të lidhur ngushtë me traditat dhe jetën e përditshme.
At Demaj thekson se Alpet kanë bukurinë e vet, por më e rëndësishme është të ruhet jetesa dhe dinjiteti i njeriut. Ai shprehet se zonat turistike si Thethi kanë nevojë për mbështetje të drejtë dhe zhvillim të qëndrueshëm, dhe jo shkatërrim të asaj që ka mbijetuar për shekuj me radhë.
Në vend të shkatërrimeve, At Demaj bën thirrje për rinovim të infrastrukturës, duke kërkuar që të investohet në rregullimin e rrugëve, duke nisur nga Prekali dhe duke i mundësuar kështu banorëve të rikthehen dhe të zhvillojnë jetën e tyre. Ai propozon që shtëpitë dhe kasollat e vjetra të rinovohen dhe të mbahen të ruajtura, duke i dhënë mundësinë banorëve të Shalës dhe Dukagjinit të riparojnë dhe restauruar ato që kanë mbetur nga e kaluara.
Në përfundim të reagimit të tij, At Kastriot Demaj i bën thirrje autoriteteve shtetërore që të mos lejojnë shkatërrimin e mëtejshëm të trashëgimisë kulturore dhe të ruajnë dinjitetin e banorëve të Thethit dhe Dukagjinit. Ai kërkon që gabimi i korrikut, kur u shembën shtëpitë dhe kasollet e ndërtuara me mund, të mos përsëritet më dhe që të ndërmerren veprime për mbrojtjen e të ardhmes së kësaj zone, e cila është thelbësore për historinë dhe zhvillimin e Shqipërisë.
