Dy persona janë plagosur me armë zjarri mbrëmjen e sotme në zonën e Laprakës në Tiranë.
Ngjarja dyshohet se ka ndodhur ...
AKTUALITET
Punimet për nënstacionin elektrik shkatërrojnë rrugët, banorët e fshatit Kryezjarr në protestë
PiranjatPërditësimi i fundit 19 Qershor 2026, 18:29
Banorët e fshatit Kryezjarr në Elbasan kanë dalë në protestë për shkak të dëmtimit të rëndë të rrugëve, të cilat sipas tyre janë shkatërruar nga mjetet e rënda që po përdoren në ndërtimin e stacionit të ri elektrik në zonë.
Sipas protestuesve, prej tre vitesh kamionët e kompanisë së kontraktuar nga Operatori i Sistemit të Transmetimit (OST) kanë dëmtuar infrastrukturën rrugore, ndërsa premtimet për rikonstruksion dhe përmirësim të akseve nuk janë mbajtur.
“Ura është e rrezikshme. Gropave nuk u shmangesh dot. Nuk ka më keq se sa të katandiset fshati në këtë gjendje”, u shpreh një banore e zonës.
Banorët kujtojnë se në fillim të projektit u ishte premtuar se ndërtimi i nënstacionit elektrik do të shoqërohej edhe me investime në rrugë.
“Na premtuan se bashkë me nënstacionin do të na bënin edhe rrugën, por ndodhi e kundërta”, tha një nga protestuesit.
Rreth 200 banorë të zonës kërkojnë rikonstruksion të plotë të rrugëve dhe shprehen të shqetësuar për rrezikun që paraqet gjendja aktuale e infrastrukturës, veçanërisht në raste emergjencash.
“Imagjinoni një aksident apo një urgjencë shëndetësore. Si do të kalojë autoambulanca në këto kushte?”, u shpreh një tjetër banor.
Protestuesit paralajmërojnë se nëse kërkesat e tyre nuk marrin zgjidhje, do të përshkallëzojnë reagimin duke bllokuar hyrjen e mjeteve në kantierin e nënstacionit elektrik.
“Nuk do të lejojmë asnjë mjet të futet në nënstacion derisa të na rregullojnë rrugën”, deklaroi një prej tyre.
Banorët kërkojnë ndërhyrje të menjëhershme nga OST dhe institucionet përgjegjëse për rikthimin e infrastrukturës në gjendje normale dhe garantimin e sigurisë së komunitetit.
