Kancelari i Gjermanisë, Friedrich Merz , ka akuzuar partinë e ekstremit të djathtë Alternative für Deutschland (AfD) se kërkon &...
AKTUALITET
Punonjësi humbi jetën nga rryma elektrike, Prokuroria procedon drejtuesit e Bashkisë Tropojë
PiranjatPërditësimi i fundit 10 Shtator 2026, 11:21
Prokuroria pranë Gjykatës së Shkallës së Parë të Juridiksionit të Përgjithshëm Kukës ka urdhëruar ndalimin e Drejtorit të Shërbimeve Publike, Turizmit dhe Transportit në Bashkinë Tropojë, shtetasit Ndriçim Gjocaj, si dhe të teknikut të mirëmbajtjes së rrugëve, Gëzim Hasanpapa.
Zyrtarët e bashkisë u ndaluan nën akuzat për “Shpërdorim detyre” dhe “Shkelja e rregullave të mbrojtjes në punë”, vijim i hetimeve për aksidentin fatal me bazë mungesën e sigurisë në punë.
Hetimet lidhen me ngjarjen e rëndë të ndodhur më 8 shtator 2026 në fshatin Bujan të Tropojës.
Katër punonjës të bashkisë po punonin për montimin e një shtylle të ndriçimit rrugor në zonë, ku gjatë procesit të ngritjes kanë rënë në kontakt të drejtpërdrejtë me përcjellësit elektrikë.
Si pasojë e goditjes nga rryma elektrike, punonjësi Muhamet Sylisufaj ka humbur jetën në vendngjarje, ndërsa tre punonjësit e tjerë kanë mbetur të plagosur me dëmtime trupore.
Ndalimi i dy zyrtarëve u krye në kuadër të procedimit penal nr. 390 të vitit 2026. Sipas organit të akuzës, drejtori dhe tekniku i bashkisë nuk kanë garantuar kushtet teknike dhe ligjore të mbrojtjes në punë për punonjësit e terrenit, duke sjellë për pasojë humbjen e jetës së njërit prej tyre dhe rrezikimin e tre të tjerëve.
