Ashtu siç pritej, me të mbërritur te kryeministria, ka nisur përplasja mes policisë dhe protestuesve.
Kanë qenë kë...
AKTUALITET
Shkatërrohet rrjeti i mafies shqiptare në Ekuador, arrestohen 16 persona!
PiranjatPërditësimi i fundit 3 Mars 2026, 18:13
Policia Kombëtare e Ekuador ka çmontuar një strukturë kriminale të lidhur me mafien shqiptare, e cila operonte në provincat Guayas, Pichincha dhe El Oro. Operacioni përfundoi me 16 persona të arrestuar, 26 kontrolle banesash dhe sekuestrimin e 7.64 tonëve lëndë narkotike, me një vlerë të përllogaritur prej 346 milionë dollarësh në tregun europian, raportoi El Diario.
Të ndaluarit u transferuan në njësinë aeropoliciale të Zonës 8, ndërsa hetimet u zhvilluan në bashkëpunim me agjenci europiane dhe amerikane.
Sipas Policisë, hetimi nisi në tetor 2024, pas një operacioni në sektorin Barbones, në provincën El Oro, ku u sekuestrua rreth gjysmë ton drogë dhe u arrestuan tre persona. Nga ajo fazë, autoritetet ekuadoriane koordinuan veprimet me Europol, si dhe me autoritetet e Holandës, Belgjikës dhe Drug Enforcement Administration (DEA).
Organizata përdorte portet ekuadoriane për të “kontaminuar” ngarkesat me destinacion Europën.
Autoritetet njoftuan se hetimet zbuluan lidhje të drejtpërdrejta me shtetas shqiptarë, të konsideruar objektiva prioritare edhe në procese të zhvilluara paralelisht në Spanjë.
Në Holandë u zhvilluan operacione të njëkohshme, ku në kuadër të operacionit “Victoria” u sekuestruan 2.5 ton drogë dhe u arrestuan pesë persona me shtetësi holandeze dhe rumune. Në operacionin “Victoria II” u sekuestruan edhe 1.2 ton të tjera, pa raportime për arrestime.
Në një tjetër operacion në territorin europian u sekuestruan 3.2 ton dhe u arrestuan tre shtetas shqiptarë. Sipas autoriteteve, totali i drogës së sekuestruar në Europë dhe Ekuador arrin në 7.64 ton.
Ministri Reimberg theksoi se ndikimi ekonomik ndaj organizatës kriminale “kalon 346 milionë dollarë”.
Pasuri të sekuestruara dhe persona të përfshirë Gjatë kontrolleve në Ekuador, Policia raportoi sekuestrimin e 14 automjeteve luksoze, 20 telefonave celularë, armë zjarri, bizhuteri dhe mbi 800 mijë dollarë para në dorë të gjetura në banesa të lidhura me rrjetin.
Mes të arrestuarve përmendet Hernán Ruilova, i kapur në Machala, i cili sipas ministrit ishte pjesë e strukturës që merrej me përzierjen e drogës në ngarkesa të destinuara për Europën. Po ashtu u arrestua ish-deputeti Salomón Padua, i cili hetohet për përfshirje në krim të organizuar dhe trafik droge.
Autoritetet nuk kanë bërë publike detaje të mëtejshme mbi rolin konkret të secilit të ndaluar, ndërsa hetimet vijojnë.
