Inspektorati Kombëtar i Mbrojtjes së Territorit ka marrë masa administrative ndaj subjektit “Polyeco Albania” Sh.p.k., pas konstati...
AKTUALITET
Shkelje në administrimin e mbetjeve/ IKMT pezullon aktivitetin e “Polyeco Albania”
PiranjatPërditësimi i fundit 8 Shtator 2026, 10:28
Inspektorati Kombëtar i Mbrojtjes së Territorit ka marrë masa administrative ndaj subjektit “Polyeco Albania” Sh.p.k., pas konstatimit të një sërë shkeljesh në procesin e administrimit, klasifikimit dhe transferimit të mbetjeve.
Sipas IKMT-së, subjekti ishte paralajmëruar më herët në përputhje me ligjin e inspektimit, ndërsa gjatë gjurmimit të rrugës së mbetjeve dhe kontrolleve të ushtruara nga Drejtoria e Inspektimit të Mjedisit dhe Ujërave janë evidentuar shkelje ligjore.
Kontrollet kanë zbuluar mospërputhje mes klasifikimit të mbetjeve, dokumentacionit të transferimit dhe aktivitetit të ushtruar nga subjekti, jashtë kushteve të lejes apo autorizimit përkatës.
Një prej problematikave të konstatuara lidhet me regjistrimin e një materiali të deklaruar si “karbon aktiv”, i cili klasifikohet si absorbent dhe material me substanca të rrezikshme. Sipas IKMT-së, verifikimi i natyrës dhe origjinës së materialit ka treguar se kodi i përdorur nuk përputhej me karakteristikat reale të mbetjes.
Gjithashtu, gjatë kontrollit janë konstatuar mospërputhje mes kodeve të mbetjeve të regjistruara dhe të transferuara nga subjekti dhe listës së kodeve të përcaktuara në kontratën e paraqitur me subjektin pritës.
Një tjetër shkelje e evidentuar është administrimi dhe pranimi i mbetjeve që nuk përfshihen në lejen apo autorizimin e aktivitetit të subjektit.
Në përfundim të kontrollit, IKMT ka vendosur masë administrative me gjobë, shuma e së cilës nuk është bërë publike dhe pezullim të aktivitetit të kompanisë.
