Dritare të thyera, njolla zjarri nëpër mure: ministria e Arsimit në Tiranë mbart gjurmët e protestave të ditëve të...
AKTUALITET
Shqiptarët “trembin” policinë holandeze, ngrihet helikopteri mbi Hagë
PiranjatPërditësimi i fundit 14 Shtator 2025, 18:47
Gjykata e Hagës ishte e rrethuar nga protestues shqiptarë këtë të dielë, të cilët ndodheshin aty në mbrojtje të udhëheqësve të UÇK-së, teksa mbanin pankartat me mesazhe për lirimin e ish luftëtarëve.
Megjithatë, raportohet se policia holandeze i bllokoi ata, duke moslejuar afrimin në institucionin e drejtësisë.
Madje, mësohet se policia ka ngritur edhe helikopter duke forcuar kontrollin dhe sigurinë në qytet.
Në Hagë, rasti kryesor po zhvillohet kundër ish-krerëve të UÇK-së, përkatësisht ndaj ish-presidentit Hashim Thaçi, ish-kryeparlamentarëve Kadri Veseli dhe Jakup Krasniqi dhe ish-deputetit të Kosovës, Rexhep Selimi, të cilët akuzohen për krime lufte dhe krime kundër njerëzimit.
Protesta në Gjykatën Speciale u mbajt një ditë para se mbrojtja e ish-krerëve të UÇK-së të nisë paraqitjen e provave të saj dhe dëshmitarëve.
Vlen të theksohet se që nga 4 dhe 5 nëntori 2020, që të katër të akuzuarit ndodhen në paraburgim në Hagë, ku janë Dhomat e Specializuara të Kosovës.
Procesi gjyqësor ndaj tyre ka nisur më prill të vitit 2023. Në mbi dy vjet, Zyra e Prokurorit të Specializuar thirri 125 dëshmitarë si dhe ka paraqitur rreth 3.000 prova materiale.
Sipas aktakuzës, Thaçi, Veseli, Selimi dhe Krasniqi akuzohen për krime kundër njerëzimit dhe krime lufte, përfshirë vrasjen e më shumë se 100 viktimave si dhe mbajtjen në paraburgim në mënyrë të paligjshme e torturimin e qindra viktimave.
