Në ceremoninë përkujtimore të 80-vjetorit të Kryengritjes së Postribës, deputeti i PD-së, Bardh Spahia, vlerësoi ...
AKTUALITET
Skandal/ Dy ditë pa ujë, qytetarët kryejnë nevojat personale me kova dhe fuçi
PiranjatPërditësimi i fundit 16 Qershor 2026, 14:38
Ndërsa temperaturat rriten dhe vera sapo ka nisur, banorët e Tiranës po përballen sërish me një problem që është kthyer në një ritual të përvitshëm: mungesën e ujit të pijshëm. Këtë herë alarmi vjen nga zona e Don Boskos, ku një qytetar denoncon një situatë të papranueshme, të publikuar disa orë më parë.
Sipas tij, prej dy ditësh rubinetat janë tharë plotësisht, duke e bërë të pamundur kryerjen e nevojave më elementare të përditshmërisë. Banorët nuk mund të lajnë enët, të kryejnë higjienën personale apo të mbajnë një standard normal jetese, ndërsa rezervat e pakta të ujit të mbledhura në fuçi janë drejt përfundimit.
Qytetari shprehet se nuk është normale që në vitin 2026, në një nga zonat më të populluara të kryeqytetit, familjet të detyrohen të mbijetojnë me bidonë dhe fuçi uji, sikur furnizimi i rregullt të ishte një luks dhe jo një e drejtë bazike. Ai thekson se pallati ku banon nuk ka depozitë në tarracë, pasi furnizimi me ujë duhet të garantohet nga institucionet përgjegjëse, ashtu siç ndodh në çdo vend normal.
Me ardhjen e çdo sezoni veror, dalin sërish në sipërfaqe problemet kronike të furnizimit me ujë në Tiranë. Premtimet për përmirësimin e rrjetit dhe investimet e trumbetuara ndër vite përplasen me realitetin e qytetarëve, të cilët në ditët më të nxehta të vitit mbeten me rubinetat bosh.
Në një kryeqytet që vazhdon të ndërtojë pa ndalim kulla e komplekse të reja, pyetja që shtrojnë banorët është e thjeshtë: si mund të përballohen mijëra apartamente të reja, kur lagje të tëra nuk arrijnë të kenë ujë as për nevojat më bazike?
Mungesa e ujit nuk është një shqetësim i vogël apo një problem sezonal që duhet pranuar me dorëzim. Është një dështim i një shërbimi jetik, për të cilin Ujësjellës Kanalizime Tiranë dhe Bashkia e Tiranës duhet të japin përgjigje konkrete për qytetarët që çdo muaj paguajnë faturat e tyre.
