Ka nisur protesta e pestë në mbrojtje të Zvërnecit, ku qytetarët kundërshtojnë projektin për ndërtimin e një r...
AKTUALITET
Skandali i turpit/ Universitetet dhe Akademia e Shkencave shndërrohen në çerdhe hajdutësh
PiranjatPërditësimi i fundit 15 Shtator 2025, 18:43
Nga Akademia e Shkencave deri tek universitet e Shkodrës dhe Elbasanit. Institucionet e dijes në Shqipëri janë të zhytura në korrupsion dhe prodhojnë më shumë hajdutëri se dije. Disa hetime administrative nga Agjencia e Prokurimeve Publike kanë çuar në pezullimin e dhjetra punonjësve në universitete dhe Akademinë e Shkencave për abuzime me tenderat publikë.
Kapitali publikon rezultat e hetimeve, të cilat janë një njollë e madhe turpi për institucionet që duhet të ishin farët e integritetit të shoqërisë. Në Universitetin e Shkodrës, APP ka konstatuar paligjshmëri të rënda në 9 tendera, nga hartimi i specifikimeve deri tek vlerësimi i fituesve. Pas hetimit APP ka propozuar marrjen e masave disiplinore për 20 punonjës të Universitetit Luigj Gurakuqi.
"Në bazë të nenit 23/e dhe nenit 132, pika 3, të Ligjit Nr. 162/2020 "Për prokurimin publik", i ndryshuar, APP vendosi të propozojë marrjen e masës disiplinore ndaj 20 (njëzet) personave, të evidentuar përgjegjës për shkelje dhe mangësi të konstatuara në vendim," thuhet në raportin e monitorimit.
Por Universiteti i Shkodrës nuk është institucioni i vetëm akademik i mbuluar nga hajdutëria. Në Universitetin e Elbasanit hetimet kanë nxjerrë të njëjtat rezultate.
"Në mbështetje të neneve 23/e dhe 132, pika 3, të Ligjit Nr. 162/2020 "Për prokurimin publik", i ndryshuar, APP vendosi t'i propozojë titullarit të Autoritetit Kontraktor, marrjen e masës disiplinore ndaj 8 (tetë) personave, të evidentuar përgjegjës për mangësi të konstatuara në vendim," zbulon APP.
Por qershia mbi tortë është Akademia e Shkencave. Ajo që duhet të ishte tempulli i dijes dhe integritetit të shoqërisë shqiptare, në fakt ka rezultuar një institucion i rëndomtë që abuzon me tenderat publikë.
"Në bazë të neneve 23/e dhe 132, pika 3, të Ligjit Nr. 162/2020 "Për prokurimin publik”, i ndryshuar, APP vendosi t’i propozojë titullarit të Autoritetit Kontraktor, marrjen e masës disiplinore ndaj 7 (shtatë) personave, për mangësi të evidentuara në vendim," thuhet në raportin hetimor të APP për Akademinë e Shkencave.
Dokumentat e bëra publike nuk e tregojnë katogrinë e masave disiplinore të marra ndaj punonjësve universitarë dhe atyre të Akademisë së Shkencave. Por mjafton vetëm fakti që në tre institucione të dijes merren masa për 35 zyrtare si abuzues tenderash për të dëshmuar se institucionet e dijes në Shqipëri më shumë vjedhin se prodhojnë shkencë. Pa përmendur këtu arrestimet e SPAK në Kamëz. /Kapitali.al/
