Ambasadori i Gjermanisë në Shqipëri, Karl Bergner i kujton kryeministrit Rama se në rrugën për integrimin në B...
AKTUALITET
Sot dita e pestë e përplasjes Ademi-Pacolli për Aeroportin e Vlorës. Si nisi konflikti
PiranjatPërditësimi i fundit 22 Maj 2026, 11:48
Nënkontraktorët e firmës “Mabco”, që punojnë në kantierin e ndërtimit të Aeroportit të Vlorës, kanë vijuar edhe sot protestën përpara hyrjes së kantierit, duke kërkuar kthimin e mjeteve dhe materialeve të punës dhe sqarime zyrtare për fatin e projektit. Protesta ka hyrë në ditën e pestë radhazi, ndërsa situata në terren mbetet e tensionuar dhe e mbikëqyrur nga forca të policisë për të garantuar rendin dhe sigurinë.
Konflikti lidhet me përplasjen mes kompanive dhe ortakëve në projektin e aeroportit, ku përballë qëndrojnë grupet e lidhura me biznesmenin Behgjet Pacolli dhe partnerin Valon Ademi, përmes kompanisë “2A Shpk”. Sipas të dhënave, Ademi pretendon se zotëron 49% të aksioneve në bazë të marrëveshjeve dhe investimeve, ndërsa zyrtarisht figuron me 2%, duke e kthyer çështjen e aksioneve në thelbin e mosmarrëveshjes që ka çuar në bllokimin e punimeve dhe përplasjet në kantier.
Historia e projektit nis në vitin 2021, kur u nënshkrua kontrata për ndërtimin e Aeroportit Ndërkombëtar të Vlorës në një sipërfaqe prej 297 hektarësh, me vlerë të parashikuar rreth 104 milionë euro dhe një strukturë koncesionare ku fillimisht ishin të përfshira Mabco Constructions e Pacollit, grupi turk YDA dhe “2A Shpk” e Valon Ademit. Pas tërheqjes së partnerit turk dhe ndryshimeve në aksione, Mabco mbeti me 98% të projektit, ndërsa më pas shpërthyen akuzat për mashtrim, falsifikim dokumentesh dhe përplasje ligjore që kanë çuar çështjen në Prokurorinë e Tiranës dhe në hetim edhe nga SPAK, ndërsa gjykata ka pezulluar të drejtën e votës së kompanisë së Pacollit deri në përfundimin e hetimeve.
