Erjon Vishkulli, 28-vjeçari që u godit me plumb gome në syrin e majtë gjatë protestës së 24 tetorit, pritet të niset...
AKTUALITET
“Spiunët” brenda institucioneve nuk po funksionojnë, vetëm 2 raste sinjalizimi në ILDKPKI në 2025
PiranjatPërditësimi i fundit 4 Qershor 2026, 10:39
Inspektorati i Lartë i Deklarimit dhe Kontrollit të Pasurive dhe Konfliktit të Interesit (ILDKPKI) raporton se gjatë vitit 2025 ka vijuar monitorimin e zbatimit të ligjit për sinjalizimin dhe mbrojtjen e sinjalizuesve, duke zgjeruar kontrollin si në sektorin publik ashtu edhe në atë privat.
Sipas raportit, në sektorin publik funksionojnë aktualisht 185 njësi përgjegjëse për sinjalizimin, të ngritura pranë institucioneve që kanë mbi 80 punonjës. Ndërkohë në sektorin privat rezultojnë 526 njësi përgjegjëse, të krijuara në organizatat me më shumë se 100 punonjës.
Raporti thekson se për organizatat që nuk respektuan detyrimin për krijimin dhe raportimin e njësive përgjegjëse janë aplikuar masa administrative me gjobë. Në total, për periudhën 2016–2025 janë vendosur 237 gjoba ndaj organizatave që nuk krijuan njësitë përgjegjëse të sinjalizimit, ndërsa gjatë vitit 2025 janë aplikuar vetëm 8 masa administrative.
Sipas të dhënave, ILDKPKI ka marrë nga sektori publik 174 raporte vjetore, ndërsa 157 njësi i kanë dorëzuar ato brenda afateve ligjore. Nga analiza e këtyre raporteve rezulton se vetëm dy institucione kanë regjistruar raste sinjalizimi gjatë vitit 2025. Një rast është raportuar nga Inspektorati Shtetëror Teknik Industrial, ku është trajtuar një sinjalizim, por hetimi administrativ nuk ka konstatuar shkelje ligjore. Rasti tjetër është regjistruar nga Bashkia Lushnje, ku njësia përgjegjëse ka vendosur mosfillimin e hetimit administrativ.
Në sektorin privat janë administruar 277 raporte sinjalizimi, ndërsa 233 njësi përgjegjëse i kanë dorëzuar raportet brenda afateve ligjore. Raporti thekson se vetëm një subjekt privat ka raportuar raste konkrete sinjalizimi gjatë vitit 2025. Sipas ILDKPKI-së, kompania “Sisal Albania” sh.p.k. ka raportuar 13 raste sinjalizimi, ku për 6 prej tyre hetimi administrativ ka përfunduar, ndërsa 7 raste janë ende në proces hetimi.
Për sa i përket mekanizmit të jashtëm të raportimit, ILDKPKI ka regjistruar dhe trajtuar gjatë vitit 2025 gjithsej 11 raste sinjalizimi dhe 8 kërkesa për mbrojtje nga hakmarrja. Sipas raportit, pjesa më e madhe e rasteve lidhen me institucione të administratës publike në nivel qendror dhe vendor, por edhe me institucione të arsimit të lartë dhe institucione të pavarura.
Objekti i sinjalizimeve përfshin dyshime për konflikt interesi, parregullsi në ushtrimin e funksioneve publike, shkelje të procedurave të prokurimeve publike dhe raste të mundshme falsifikimi të dokumenteve zyrtare. Një pjesë e rasteve lidhen edhe me marrëdhëniet e punës dhe pretendime për trajtim të padrejtë të punonjësve apo nevojën për mbrojtje nga hakmarrja.
Raporti thekson se për procedurat që kanë rezultuar në shkelje të kuadrit ligjor janë vendosur masa administrative me gjobë. Në total, për periudhën 2017–2025 janë marrë 13 masa administrative në kuadër të hetimeve të kryera për sinjalizimet dhe kërkesat për mbrojtje.
Në disa raste, pas hetimeve administrative, janë njoftuar edhe institucionet kompetente si Kontrolli i Lartë i Shtetit, strukturat e Policisë së Shtetit dhe titullarët e institucioneve publike për marrjen e masave të mëtejshme, megjithatë nuk rezultoi që të kishin ndodhur akte hakmarrjeje të lidhura drejtpërdrejt apo tërthorazi me sinjalizuesit. /ekofin.al
