Sezoni turistik i këtij viti, është njollosur nga disa ngjarje të rënda, që kanë pasur për protagonistë edhe staf...
AKTUALITET
Viktimat e aksidentit tragjik në Manëz ishin çift i porsamartuar, familja e vajzës italiane: Nuk e dinim këtë fakt
PiranjatPërditësimi i fundit 21 Gusht 2026, 15:41
Tragjedia e rëndë automobilistike në Manzë të Durrësit, ku humbën jetën tre të rinj, ka tronditur edhe Italinë. Mes viktimave ishte 26-vjeçarja italiane Sara Brugnatelli dhe partneri i saj, 25-vjeçari shqiptar Kleo Vrioni. Corriere della Sera shkruan se, në Itali, familjarët dhe miqtë e Sarës janë në pritje të kthimit të trupit të saj. Ajo përshkruhet nga të afërmit si një vajzë e dashuruar me jetën dhe kuajt, pasioni i saj i madh. 26-vjeçarja ishte shumë e lidhur me të atin dhe kujdesej për të për shkak të problemeve shëndetësore.
Sara kishte jetuar prej vitesh në Zocco di Erbusco, ndërsa kohët e fundit qëndronte edhe në Ponte San Pietro, në zonën e Bergamos, ku jetonte partneri i saj. Ajo kishte punuar si muratore dhe më pas si asistente shitjesh në një dyqan me produkte për kafshët shtëpiake.Ndërkohë, një detaj i pazakontë që po verifikohet nga familjarët është pretendimi se Sara dhe Kleo ishin martuar më 16 gusht, vetëm tre ditë para aksidentit tragjik. Sipas mediave shqiptare, ceremonia mund të jetë zhvilluar në Shqipëri, në qytetin e lindjes së Vrionit, në mënyrë private.
Familja e 26-vjeçares ka deklaruar se nuk kishte dijeni për martesën dhe po përpiqet të verifikojë rrethanat.
Hetimet për aksidentin vijojnë, ndërsa autoritetet shqiptare pritet të përcaktojnë dinamikën e plotë të përplasjes dhe shkaqet që çuan në humbjen e kontrollit të automjetit. Trupi i Sara Brugnatelli pritet të kthehet në Itali pas përfundimit të procedurave në Shqipëri. Data e ceremonisë së lamtumirës ende nuk është bërë e ditur.Aksidenti ndodhi pak pas orës 02:00 të mëngjesit, në një rrugë dytësore në Manzë. Në automjetin tip BMW udhëtonin pesë persona. Përveç çiftit, humbi jetën edhe një 15-vjeçar, ndërsa dy persona të tjerë, 25 dhe 16 vjeç, mbetën të plagosur.
Sipas rindërtimit paraprak të ngjarjes, të rinjtë po ktheheshin nga një klub ku kishin kaluar mbrëmjen. Pamjet e publikuara tregojnë BMW-në duke lëvizur me shpejtësi, përpara se drejtuesi të humbiste kontrollin. Automjeti u përplas me një strukturë betoni dhe më pas u përmbys.
Një analizë paraprake e videos ka vlerësuar se makina mund të ketë qenë duke lëvizur me rreth 114 km/h. Shpejtësia, megjithatë, mbetet për t’u përcaktuar përfundimisht nga ekspertiza teknike.
