Të dhënat e INSTAT: Turizmi me rritje të dobët dhe në Prill, hyrjet e të huajve zgjerohen me 3.2%

TIRANA- Pas një ngadalësimi të lehtë në muajin mars, Prilli ka sjellë sinjale pozitive për sektorin e turizmit dhe lëvizjet ndërkufitare.Të dhënat më të fundit të publikuara nga INSTAT tregojnë një rritje të lehtë të numrit të hyrjeve në territorin shqiptar, si nga shtetasit shqiptarë ashtu edhe nga të huajt.

Rritja e qarkullimit vjen në prag të sezonit veror, duke reflektuar një interesim në rritje për Shqipërinë si destinacion udhëtimi dhe kthimin e flukseve në nivele më të larta krahasuar me vitin e kaluar.

Sipas Instat gjatë muajit Prill 2025, rezultojnë të kenë hyrë, në territorin e Republikës së Shqipërisë, 1.487.149 shtetas shqiptarë dhe të huaj. Ky tregues ka pësuar një rritje me 6,0%, krahasuar me Prill 2024.

1.485.226 shtetas shqiptarë dhe të huaj rezultojnë të kenë dalë nga territori i Republikës së Shqipërisë, duke shënuar një rritje me 5,9%, krahasuar me të njëjtën periudhë të një viti më parë.

Në Prill 2025, numri i shtetasve shqiptarë që kanë hyrë në territorin shqiptar është 667.998, duke pësuar një rritje me 9,6%, krahasuar me Prill 2024.

Numri i shtetasve të huaj që kanë hyrë në territorin shqiptar është 819.151. Ky numër është rritur me 3,2%, krahasuar me të njëjtën periudhë të vitit 2024.

Në muajin Prill 2025, 683.983 shtetas shqiptarë numërohen të kenë dalë nga territori i Shqipërisë, duke shënuar rritje me 11,5%, krahasuar me Prill 2024.

Daljet e shtetasve të huaj nga territori i Shqipërisë gjatë muajit Prill 2025, janë 801.243. Krahasuar me të njëjtën periudhë të një viti më parë, ky tregues është rritur me 1,5%.

Në Prill 2025, 95% e hyrjeve të shtetasve të huaj në Shqipëri janë nga rajoni i Europës. Europa Jugore zë 74% të hyrjeve të shtetasve të huaj nga kontinenti Europian, ndjekur nga Europa Perëndimore me 13%.

Qëllimi i hyrjes në territorin shqiptar i shtetasve të huaj, në 97% të rasteve është për qëllime personale, ku dominojnë hyrjet për Pushime, vizitë tek të afërm, etj.

Në Prill 2025, ky tregues ka shënuar një rritje me 0,8%, krahasuar me Prill 2024. Hyrjet e shtetasve të huaj për qëllime Biznesi dhe profesionale janë rritur me 40,8%./Monitor.