DashiSot fuqitë tuaja bindëse janë në nivelin më të lartë. Kjo është një ditë e mirë për t&eu...
AKTUALITET
Të dhënat personale, diskutohet metodologjia për gjobat, mund të arrijnë deri në 20 mln euro
r.llPërditësimi i fundit 21 Prill 2025, 08:16
foto ilustruese
TIRANË- Pak muaj pas hyrjes në fuqi të ligjit “Për mbrojtjen e të dhënave personale” zyra e Komisionerit për Mbrojtjen e të Dhënave Personale dhe të Drejtën e Informimit ka bërë publik metodologjinë mbi të cilën do të llogariten masat administrative në rastet e shkeljeve, duke e çuar për konsultim te grupet e interesit.
Kujtojmë që ligji i ri u përafrua me direktivën e Bashkimit Europian konkretisht rregullorja 2016/679 e Parlamentit Europian dhe Këshillit (GDPR) që ndër të tjera parashikon sanksione deri në 2 miliardë lekë apo 20 milionë euro, gjoba që konsiderohen tepër të larta për madhësinë e bizneseve dhe ekonominë shqiptare, teksa vetëm rreth 210 biznese në vend kanë një qarkullim më të lartë sesa 2 miliardë lekë (20 mln euro), sipas renditjes së “Monitor 200”.
Por çfarë parashikon metodologjia në fjalë që aktualisht është në fazë konsultimi? Në përshkrimin e qëllimit të saj theksohet se masa përfundimtare e sanksionit varet nga të gjitha rrethanat e çështjes specifike, të cilat do të vlerësohen rast pas rasti.
“Prandaj, Zyra e Komisionerit synon një qasje harmonizuese sa i takon ekzistencës së një modeli të ndjekur për përllogaritjen e masës së sanksionit, në vend të harmonizimit të rezultatit të përllogaritjes “thuhet në metodologji.
Pasqyra e sintetizuar e metodologjisë
Në mënyrë të përmbledhur dokumenti i Komisionerit vlerëson pesë hapa që janë në bazë të përllogaritjes së një mase administrative. Kjo mban parasysh procesin apo veprimtarinë e përpunimit, xhiron e ndërmarrjes, rrethanat lehtësuese apo rënduese apo proporcionalitetin.
Identifikimi i proceseve/veprimtarisë së përpunimit sipas rastit konkret dhe vlerësimi i zbatimit të pikës 3 të nenit 93, të Ligjit për Mbrojtjen e të Dhënave (Kapitulli 3).
Përcaktimi i modelit për përllogaritjen e mëtejshme të sanksionit bazuar në një vlerësim të (Kapitulli 4): a) klasifikimit të shkeljes sipas pikave 1, 2 dhe 3, të nenit 94, të Ligjit për Mbrojtjen e të Dhënave; b) seriozitetit të shkeljes sipas germave “a”, “b” dhe “e” të pikës 2, të neni 93, të Ligjit për Mbrojtjen e të Dhënave; c) xhiros së Ndërmarrjes, si një element i rëndësishëm për t’u marrë në konsideratë me synim vendosjen e një sanksioni efektiv, proporcional dhe me karakter parandalues, sipas pikës 1, të nenit 93, të Ligjit për Mbrojtjen e të Dhënave.
Vlerësimi i rrethanave rënduese dhe lehtësuese që lidhen me sjelljen e mëparshme ose të tanishme të kontrolluesit/përpunuesit si dhe zmadhimi ose zvogëlimi i masës së sanksionit në përputhje me këto rrethana (Kapitulli 5).
Identifikimi i tavanit të përcaktuar ligjor, për masën e sanksionit lidhur me proceset/veprimtaritë e ndryshme të përpunimit. Zmadhimet e aplikuara në hapat e mëparshëm ose të ardhshëm nuk mund të tejkalojnë këtë tavan (Kapitulli 6).
Kryerja e analizës nëse shuma përfundimtare e sanksionit të përllogaritur plotëson kërkesat e efektivitetit, proporcionalitetit dhe karakterit parandalues, siç kërkohet nga dispozitat e pikës 1, të 93, të Ligjit për Mbrojtjen e të Dhënave dhe duke zmadhuar ose zvogëluar masën e sanksionit në përputhje me rrethanat (Kapitulli 7)./MONITOR
