Situata e zjarreve në Shqipëri vijon të kërkojë ndërhyrje në disa zona të vendit.
Sipas Ministrisë së Mbroj...
AKTUALITET
Tenderët/ Në 2024 shfaqën problem me zbatimin 78 kontrata, nga vonesat tek ndërprerja e njëanshme
n.fPërditësimi i fundit 11 Prill 2025, 11:36
TIRANË- Të paktën 78 kontrata që kanë objekte të ndryshme në përbërje të tyre kanë shfaqur probleme me zbatimin gjatë vitit të kaluar. Të dhënat zyrtare të Agjencisë së Prokurimit Publik (APP) tregojnë se nisur nga numri total prej 2615 raportimeve për zbatimin e kontratës, të dërguara pranë APP, 2.98 % e tyre kanë patur problematika gjatë zbatimit.
Konkretisht pjesën më të madhe të tyre e përbën problematika e vonesave në zbatim ku autoritetet kanë aplikuar penalitete ndaj kontratktorëve përkatës në 28 kontrata. Raporti i APP vlerëson se për 10 kontrata, raportohet aplikim penalitetesh, por pa dhënë arsyet ndërkohë që për 2 kontrata, raportohen vonesa në zbatimin e kontratës, por pa raportuar masat e marra.
Po kështu për 10 kontrata, raportohet mospërmbushje e detyrimeve kontraktuale, ku në 2 raste raportohet njëkohësisht edhe aplikimi i penaliteteve për vonesa në dorëzim për pjesën e zbatuar të kontratës. Para hyrjes në fuqi të ndryshimeve të LPP (ligjit për prokurimet publike), në rastet që autoritetet kontraktore nuk kanë raportuar për paraqitjen e kërkesës për përjashtimin e operatorëve ekonomikë, ka informuar Drejtorinë Juridike për situatën e raportuar.
Për 4 kontrata, raportohet se kontrata nuk është realizuar sipas kushteve të saj, por në vijim kontraktori ka korrigjuar mospërmbushjen. Për 1 kontratë, raportohen vonesa për marrjen në dorëzim, për shkak të mosparaqitjes së një anëtari të marrjes në dorëzim.
Sipas APP për një tjetër 1 kontratë raportohen problematika, pasi megjithëse kontraktori ka realizuar shërbimet objekt kontrate për mirëmbajtjen e printerit, ai vazhdon të mos funksionojë kurse për 7 kontrata, raportohen pezullime punimesh, apo vonesa në fillimin e zbatimit të kontratës, për shkak të problematikave që lidhen me lirimin e sheshit të ndërtimit, apo marrjen e lejeve të nevojshme për ecurinë e punimeve objekt kontrate, apo problematikave që ndikonin në realizimin e kontratës.
Autoritetet kanë raportuar se për 9 kontrata, ka pasur ndërprerje /përfundim të saj para afatit apo mosrealizim në vlerën e plotë të tyre, për shkak të ndryshimit të nevojave të autoritetit kontraktor, apo ndryshimit të çmimeve në treg për mallrat objekt kontrate.
Në fund për 2 kontrata, raportohet ndërprerje e njëanshme e kontratës nga kontraktori, pasi pretendonte se kishte llogaritur gabim ofertën e tij. Në këtë rast autoritetet kontraktore kanë paraqitur pranë APP kërkesë për përjashtim të operatorit ekonomik.
Për 4 kontrata raportohen problematika, pasi kontraktori edhe pse ka realizuar shërbimet, nuk ka paraqitur çdo muaj faturat e shërbimeve të dhëna, por ka paraqitur vetëm 1 faturë në përfundim të kontratës, si dhe raportohen probleme financiare./ Monitor
